আজি নগাঁৱৰ কেন্দ্ৰীয় যোগ দিৱসত অংশগ্ৰহণ কৰিব মুখ্যমন্ত্ৰী সোণোৱালে

সমগ্ৰ দেশৰ লগতে নগাঁৱতো আজি আন্তৰাষ্ট্ৰীয় যোগ দিৱস উদযাপন হ’ব। নগাঁৱৰ নুৰুল আমিন ষ্টেডিয়ামত নগাঁও জিলা প্ৰশাসনৰ উদ্যোগত অসম চৰকাৰে আয়োজিত আন্তঃৰাষ্ট্ৰীয় যোগ দিৱস উপলক্ষে ব্যাপক প্ৰস্তুতি গ্ৰহণ কৰিছে।

বুধবাৰে নগাঁও জিলা উপায়ুক্তৰ সভাকক্ষত আয়োজিত এক সংবাদমেলত উপায়ুক্ত  বিশ্বজিৎ পেগুৱে এই কথা সদৰী কৰি কয় যে যোগ দিৱস সফল কৰি তোলাৰ বাবে ইতিমধ্যে সকলো ব্যৱস্থা  গ্ৰহণ কৰা হৈছে। নিৰাপত্তা ব্যৱস্থাও সুদৃঢ় কৰাৰ লগতে চাৰিটা আকৰ্ষণীয় মণ্ডপ নিৰ্মাণ কৰা হৈছে।

এই কাৰ্যসূচীত আঠ হাজাৰ লোকে অংশগ্ৰহণ কৰিব বুলি উপায়ুক্তগৰাকীয়ে জানিবলৈ দিয়ে।

আজি পুৱা ৬ বজাৰ পৰা আৰম্ভ হ’ব লগা এই অনুষ্ঠানত অসমৰ মুখ্যমন্ত্ৰী সৰ্বানন্দ সোণোৱাল, বিত্ত, স্বাস্থ্য আৰু গড়কাপ্তানি মন্ত্ৰী ডঃ হিমন্ত বিশ্ব শৰ্মা, কেন্দ্ৰীয় ৰে’ল ৰাজ্যমন্ত্ৰী ৰাজেন গোহাঁই, অসমৰ ৰাজ্যিক স্বাস্থ্য মন্ত্ৰী পীযুষ হাজৰিকা, নগাঁও সদৰ সমষ্টিৰ বিধায়ক ৰূপক শৰ্মা আদিয়ে অংশ গ্ৰহণ কৰিব।

পুৱা ৭ বজাত যোগৰ গণ প্ৰদৰ্শন আৰম্ভ হ’ব আৰু ৮ বজাত গণ প্ৰৰ্দশনৰ সমাপ্তি ঘটিব। কেন্দ্ৰীয় যোগ দিৱসৰ সমূহ কাৰ্যসূচীত সকলো স্তৰৰ ৰাইজৰ সহযোগিতা কামনা কৰিছে জিলা প্ৰশাসনে।

নগাঁৱৰ এই যোগ দিৱসত জিলাখনৰ বিভিন্ন দল-সংগঠন আৰু অনুষ্ঠান-প্ৰতিষ্ঠানে সহযোগিতা কৰিছে বুলি জিলা উপায়ুক্তগৰাকীয়ে জানিবলৈ দিয়ে।