৯০ শতাংশ মহিলাৰ ৰাজনৈতিক কেৰিয়াৰ আৰম্ভ হয় নেতাৰ শোৱনি কোঠাত : বিতৰ্কিত মন্তব্য সাংসদ পাপ্পু যাদৱৰ

নিৰ্দলীয় সাংসদ পাপ্পু যাদৱৰ এটা বিতৰ্কিত মন্তব্যই বৰ্তমান দেশৰ ৰাজনীতিত তীব্ৰ চাঞ্চল্যৰ সৃষ্টি কৰিছে। লোকসভাত মহিলা সংৰক্ষণ বিধেয়কৰ ওপৰত আলোচনা চলি থকাৰ সময়তে যাদৱে কয় যে অধিকাংশ মহিলাই এজন পুৰুষ ৰাজনীতিবিদৰ কোঠাত সময় অতিবাহিত নকৰাকৈ ৰাজনীতিত টিকি থাকিব নোৱাৰে। তেওঁ পুৰুষ ৰাজনীতিবিদসকলক শগুনৰ সৈতে তুলনা কৰি অভিযোগ কৰে যে আমেৰিকাৰ পৰা ভাৰতলৈকে ৰাজনীতিবিদসকলে মহিলাৰ ওপৰত চকু দিয়ে আৰু তেওঁলোকক শোষণ কৰে। তেওঁৰ মতে প্ৰায় ৯০ শতাংশ মহিলা ৰাজনীতিবিদৰ ক্ষেত্ৰতে এনে ঘটনা ঘটে আৰু এয়া বৰ্তমান এক সংস্কৃতিত পৰিণত হৈছে।

পাপ্পু যাদৱৰ এই মন্তব্যৰ পিছতে বিজেপি দলে তেওঁক তীব্ৰ সমালোচনা কৰিছে। বিজেপিৰ মুখপাত্ৰ শ্বেহজাদ পুনাৱালাই এই মন্তব্যক অত্যন্ত অপমানজনক আৰু মহিলা বিৰোধী আখ্যা দিছে। তেওঁ কয় যে এই ধৰণৰ চিন্তাধাৰাই বিৰোধী পক্ষৰ আচল স্বৰূপ উদঙাই দিছে। ইয়াৰ উপৰিও পুনাৱালাই কংগ্ৰেছ নেত্ৰী প্ৰিয়ংকা গান্ধীৰ মৌনতাক লৈও প্ৰশ্ন উত্থাপন কৰিছে। তেওঁ কয় যে যিগৰাকী প্ৰিয়ংকা গান্ধীয়ে মই ছোৱালী, মই যুঁজিব পাৰোঁ বুলি শ্লোগান দিছিল, তেওঁ এতিয়া কিয় মনে মনে আছে।

আনহাতে বিজেপি নেত্ৰী চাৰু প্ৰজ্ঞাই পাপ্পু যাদৱক সংসদৰ পৰা নিলম্বন কৰাৰ লগতে নিৰ্বাচন খেলাৰ পৰাও নিষিদ্ধ কৰিবলৈ দাবী জনাইছে। তেওঁ ৰাহুল গান্ধী আৰু তেজস্বী যাদৱক এই সন্দৰ্ভত নিজৰ স্থিতি স্পষ্ট কৰিবলৈ প্ৰত্যাহ্বান জনাইছে। এই সমগ্ৰ বিতৰ্কৰ মাজতে বিহাৰ ৰাজ্যিক মহিলা আয়োগে কঠোৰ স্থিতি গ্ৰহণ কৰিছে। মহিলাৰ মৰ্যাদাহানি কৰা এনে মন্তব্যৰ বাবে আয়োগে সাংসদ পাপ্পু যাদৱলৈ ইতিমধ্যে এখন জাননী প্ৰেৰণ কৰিছে। এই ঘটনাই এতিয়া ৰাষ্ট্ৰীয় পৰ্যায়ত এক ডাঙৰ ৰাজনৈতিক বিতৰ্কৰ ৰূপ লৈছে।