“ন্যায় আমিও বিচাৰোঁ, নিৰপৰাধী মানুহক জেইলত ৰখা হৈছে’’ : শ্যামকানুৰ পত্নীৰ মন্তব্য

প্ৰখ্যাত সংগীত শিল্পী জুবিন গাৰ্গৰ মৃত্যুৰ সৈতে জড়িত গোচৰত কাৰাগাৰত বন্দী হৈ থকা শ্যামকানু মহন্তৰ পক্ষত এইবাৰ থিয় দিছে তেওঁৰ পত্নী অনিতা ডেকা মহন্তই। বুধবাৰে সাংবাদিকৰ আগত তেওঁ স্পষ্টকৈ কয় যে তেওঁৰ স্বামী সম্পূৰ্ণ নিৰ্দোষী আৰু তেওঁকো ন্যায় লাগে।

বিগত সাত মাহ ধৰি কোনো দোষ নোহোৱাকৈ শ্যামকানু মহন্তক কাৰাগাৰত ৰখা হৈছে বুলি তেওঁ ক্ষোভ প্ৰকাশ কৰে। তেওঁ কয় যে উত্তৰ-পূবৰ সংস্কৃতিক বিশ্ব দৰবাৰত চিনাকি কৰাই দিয়াটোৱেই যদি অপৰাধ হয়, তেন্তে ই অতি দুৰ্ভাগ্যজনক।

জুবিন গাৰ্গৰ কথা উল্লেখ কৰি অনিতা মহন্তই কয় যে জুবিন এজন অতি পবিত্ৰ মনৰ মানুহ আছিল। জুবিনৰ যি লক্ষ্য আছিল, সেই লক্ষ্যত উপনীত হ’বলৈ শ্যামকানু মহন্তই তেওঁৰ লগত দিনে-ৰাতিয়ে কাম কৰিছিল। এনে পৰিস্থিতিত নিজৰ এজন ঘনিষ্ঠ সহযোগী কাৰাগাৰত থকা দেখিলে জুবিনৰ আত্মাইও দুখ পাব বুলি তেওঁ মন্তব্য কৰে।

স্বামীৰ বিৰুদ্ধে অহা অৱহেলাৰ অভিযোগো তেওঁ পোনচাটেই নাকচ কৰে। তেওঁ প্ৰশ্ন কৰে যে এজন শিল্পীক আন্তৰ্জাতিক মঞ্চত অনুষ্ঠান পৰিৱেশন কৰিবলৈ লৈ যোৱাটো কেনেকৈ অৱহেলা হ’ব পাৰে।

ছিংগাপুৰৰ সেই দুৰ্ভাগ্যজনক ঘটনাটোৰ বিষয়ে বিতং তথ্য দি তেওঁ জনায় যে জুবিন গাৰ্গক ছিংগাপুৰৰ অন্যতম শ্ৰেষ্ঠ হোটেল পান পেচিফিকত ৰখা হৈছিল। তাৰ পৰা মাত্ৰ ৪০০ মিটাৰ দূৰত্বতে এখন উন্নত চিকিৎসালয় আছিল। কোনো ইয়াত পাৰ্টীলৈ যোৱাৰ পৰিকল্পনা নাছিল আৰু সেই সময়ত শ্যামকানু মহন্ত নিজে ঘটনাস্থলীৰ পৰা প্ৰায় ৫০ কিলোমিটাৰ দূৰত এখন বৈঠকত ব্যস্ত আছিল। আনকি সেই সময়ত অনিতা মহন্ত নিজেও ছিংগাপুৰতে উপস্থিত আছিল বুলি জানিবলৈ দিয়ে। জুবিন গাৰ্গে কাৰোবাৰ হেঁচাত ছিংগাপুৰলৈ গৈছিল বুলি ওলোৱা খবৰকো তেওঁ ভিত্তিহীন বুলি অভিহিত কৰে। জুবিনক কোনেও কোনো কাম কৰিবলৈ বাধ্য কৰিব নোৱাৰে বুলি তেওঁ দৃঢ়তাৰে কয়।

বৰ্তমান গুৱাহাটীৰ ফাষ্ট ট্ৰেক আদালতত শ্যামকানু মহন্তৰ জামিন আবেদনৰ শুনানি চলি আছে। জ্যেষ্ঠ অধিবক্তা প্ৰাণ বৰাই আদালতত মহন্তৰ হৈ যুক্তি দৰ্শাব। আনহাতে আন এজন অভিযুক্ত সিদ্ধাৰ্থ শৰ্মাৰ আবেদনত কিছু ত্ৰুটি থকাৰ বাবে আদালতে তেওঁক নতুনকৈ আবেদন কৰিবলৈ ২৪ ঘণ্টা সময় দিছে।

উল্লেখ্য যে অসম বিধানসভা নিৰ্বাচনৰ ভোটগ্ৰহণ শেষ হোৱাৰ ঠিক পিছদিনাই অৰ্থাৎ ১০ এপ্ৰিলত মহন্তই এই জামিন আবেদন দাখিল কৰিছিল।