সহস্ৰাধিক ভক্তৰ উপস্থিতিত মাজুলী আউনীআটী সত্ৰৰ ৪০০ বৈষ্ণৱৰ বাবে ৯৭ টা ‘বহা’ উদ্বোধন

অসমৰ সত্ৰীয়া সংস্কৃতিৰ অন্যতম আকৰ মাজুলীৰ আউনীআটী সত্ৰই পালে নতুন ৰূপ। ৩৭৩ বছৰ পূৰ্বেই মাজুলীত প্ৰতিষ্ঠা পোৱা সত্ৰখনিৰ ভকত বৈষ্ণৱ থকা বহা সমুহ ক্ৰমাৎ জহি খহি যাবলৈ ধৰিছিল। ভকত বৈষ্ণৱ থকা বহা স্থান ক্ৰমে জৰাজীৰ্ণ হ’বলৈ ধৰাৰ ফলত নাম কীৰ্ত্তন, সত্ৰীয়া কলা সংস্কৃতিৰ প্ৰচাৰ প্ৰসাৰত ব্ৰতী থকা ভকত বৈষ্ণৱসকলৰ থকা-খোৱাৰ লগতে নিয়মীয়া ধৰ্মীয় কাম-কাজ সমুহ সম্পন্ন কৰাটোৱেই অসুবিধা হৈ পৰিছিল।

সত্ৰৰ বৈষ্ণৱ সকলৰ এই দূখ সহিব নোৱাৰি আউনীআটী সত্ৰৰ সত্ৰাধিকাৰ পীতাম্বৰ দেৱ গোস্বামীয়ে প্ৰায় ষাঠি লাখ টকা ব্যয় কৰি সত্ৰৰ ৪০০ বৈষ্ণৱৰ বাবে ৯৭ খন বহা নিৰ্মাণ কৰাই উলিয়ায়। দীৰ্ঘ দিনৰ নিৰ্মাণ কাৰ্যৰ পিছত বৃহস্পতিবাৰে সত্ৰাধিকাৰে সত্ৰৰ নতুন গৃহ সমুহ শুভ উদ্বোধন কৰে।

ৰাতিলৈ মাজুলীৰ সকলো প্ৰান্তৰ ভকত বৈষ্ণৱ সকলক নিমন্ত্ৰন কৰি  ভক্তিভাৱেৰে আয়োজন কৰা বিশেষ অনুষ্ঠান সত্ৰৰ পৰম্পৰাগত বাৰ্ষিক উৎসৱ ‘বৈৰাগী নাম’ৰ আয়োজন কৰে । সত্ৰৰ চৌপাশ মিঠাতেলৰ চাকিৰ পোহৰত উজ্বলি উঠে । হৰি নামৰ ধ্ধনিত মূখৰিত হৈ পৰে সত্ৰৰ চৌহদ । বছৰ বছৰ ধৰি সন্মুখীন হৈ অহা দূখ কষ্টৰ পিছত ভকত বৈষ্ণৱ সকলে ন গৃহত প্ৰবেশ কৰি পৰম সন্তোষ লাভ কৰে ।