পুত্ৰৰ বিয়াত উপস্থিত নাথাকিব ড’নাল্ড ট্ৰাম্প! সংবাদ মাধ্যমক কি ক’লে মাৰ্কিন ৰাষ্ট্ৰপতিজনে?

ইৰানৰ সৈতে চলি থকা আন্তঃৰাষ্ট্ৰীয় উত্তেজনাৰ মাজতে আমেৰিকাৰ ৰাষ্ট্ৰপতি ডোনাল্ড ট্ৰাম্পে এক ডাঙৰ মন্তব্য কৰিছে। তেওঁ জনাইছে যে তেওঁৰ ডাঙৰ পুত্ৰ ডোনাল্ড ট্ৰাম্প জুনিয়ৰৰ বিয়াত তেওঁ হয়তো উপস্থিত থাকিব নোৱাৰিব। ইয়াৰ লগতে সংবাদ মাধ্যমক কটাক্ষ কৰি তেওঁ ধেমেলীয়াকৈ কয় যে তেওঁ বিয়ালৈ গ’লেও সংবাদ মাধ্যমে তেওঁক সমালোচনাৰে থকা-সৰকা কৰিব আৰু নগ’লেও ভুৱা খবৰেৰে তেওঁক আক্ৰমণ কৰিব। গতিকে দুয়োটা পৰিস্থিতিতে তেওঁ একপ্ৰকাৰ সংবাদ মাধ্যমৰ হাতত অতিষ্ঠ হ’ব লাগিব।

সাংবাদিকৰ সৈতে হোৱা এক বাৰ্তালাপত ট্ৰাম্পে কয় যে তেওঁ বিয়াত উপস্থিত থকাৰ চেষ্টা কৰিব, কিন্তু ইৰানৰ বৰ্তমানৰ পৰিস্থিতি আৰু তেওঁক লৈ সংবাদ মাধ্যমে কৰিব পৰা সম্ভাৱ্য সমালোচনাৰ বাবে এই সময়ছোৱা একেবাৰে অনুকূল নহয়। তেওঁৰ মতে এইটো এনে এটা পৰিস্থিতি য’ত তেওঁৰ কোনো জয় হোৱাৰ সম্ভাৱনা নাই। আন্তঃৰাষ্ট্ৰীয় পৰিস্থিতি আৰু ৰাষ্ট্ৰপতিৰ নিৰাপত্তাজনিত কাৰণতো তেওঁৰ এই যাত্ৰা এতিয়াও অনিশ্চিত হৈ আছে।

উল্লেখ্য যে ৪৮ বছৰীয়া ডোনাল্ড ট্ৰাম্প জুনিয়ৰে এই সপ্তাহান্তত বাহামাত এটা ব্যক্তিগত অনুষ্ঠানত পাম বিচৰ মডেল তথা পৰিচিত মুখ বেটিনা এণ্ডাৰছনৰ সৈতে বিবাহপাশত আৱদ্ধ হ’বলৈ গৈ আছে। এই বিয়াখন অতি গোপনীয় আৰু ব্যক্তিগত কৰি ৰখা হৈছে, য’ত কেৱল পৰিয়ালৰ অতি ঘনিষ্ঠ সদস্য আৰু বন্ধু-বৰ্গকহে আমন্ত্ৰণ জনোৱা হৈছে। যোৱা ডিচেম্বৰ মাহত হোৱাইট হাউচৰ এটা অনুষ্ঠানত ট্ৰাম্প জুনিয়ৰে এণ্ডাৰছনৰ সৈতে আঙুঠি পিন্ধোৱাৰ কথা ঘোষণা কৰিছিল। কেম্প ডেভিডত তেওঁলোকৰ আঙুঠি পিন্ধোৱা পৰ্ব সম্পন্ন হৈছিল আৰু পাছত এণ্ডাৰছনে মাৰ-এ-লাগোত এক বিশেষ অনুষ্ঠানৰো আয়োজন কৰিছিল।

ট্ৰাম্প জুনিয়ৰৰ এইখন দ্বিতীয় বিবাহ হ’ব। ইয়াৰ পূৰ্বে তেওঁ ভেনেশা ট্ৰাম্পৰ সৈতে বিবাহপাশত আৱদ্ধ হৈছিল আৰু তেওঁলোকৰ পাঁচটা সন্তান আছে। অৱশ্যে ২০১৮ চনত তেওঁলোকৰ বিবাহ বিচ্ছেদ হয়। শেহতীয়াকৈ ভেনেশা ট্ৰাম্পে নিজৰ স্তন কেন্সাৰ হোৱাৰ কথাও ৰাজহুৱা কৰিছে। ইয়াৰ উপৰিও ২০২৪ চনত সম্পৰ্ক শেষ হোৱাৰ পূৰ্বে ট্ৰাম্প জুনিয়ৰে কিম্বাৰ্লি গিলফইলৰ সৈতেও বাগদান সম্পন্ন কৰিছিল।