আমেৰিকান পৰ্যটকৰ হেৰোৱা এটিএম কাৰ্ড ঘূৰাই দিবলৈ অট’ৰিক্সাৰে ৬ ঘণ্টা যাত্ৰা কৰিলে কেৰালাৰ যুৱকে

আমেৰিকাৰ এগৰাকী মহিলা পৰ্যটকে কেৰালা ভ্ৰমণলৈ আহি নিজৰ এটিএম কাৰ্ড এখন ভুলবশতঃ পাহৰি থৈ আহে। কিন্তু এগৰাকী স্থানীয় যুৱকৰ মহানুভৱতাৰ বাবে তেওঁ কাৰ্ডখন ঘূৰাই পায়। যুৱকজনে কাৰ্ডখন ঘূৰাই দিবলৈ অট’ৰিক্সাৰে প্ৰায় ৬ ঘণ্টা সময় যাত্ৰা কৰিছিল। এই মানৱীয় ঘটনাই এতিয়া ছ’চিয়েল মিডিয়াত সকলোৰে হৃদয় জিনিছে।

মহিলাগৰাকীয়ে ইনষ্টাগ্ৰামত এই বিষয়ে এটা ভিডিঅ’ শ্বেয়াৰ কৰিছে। তেওঁ অকলশৰে কেৰালা ভ্ৰমণ কৰি আছিল। সাগৰৰ পাৰৰ এখন চহৰৰ এটা এটিএমত তেওঁ নিজৰ ডেবিট কাৰ্ডখন এৰি থৈ গৈছিল। প্ৰায় পাঁচ ঘণ্টাৰ অন্তত ৰাজধানী পোৱাৰ পিছতহে তেওঁ কাৰ্ডখন হেৰুওৱাৰ কথা গম পায়। সেইদিনাই পুৱা তেওঁ এটা ডি এইচ এল অফিচলৈ গৈছিল আৰু তাৰ এজন কৰ্মচাৰীৰ সৈতে ফোন নম্বৰ আদান-প্ৰদান কৰিছিল। কাৰ্ডখন হেৰুওৱাৰ কথা গম পোৱাৰ লগে লগে তেওঁ সেই কৰ্মচাৰীজনক মেছেজ কৰি এটিএমটোত কাৰ্ডখন আছে নেকি চাবলৈ অনুৰোধ কৰে।

আচৰিত কথা যে প্ৰায় এদিনৰ পিছতো কাৰ্ডখন এটিএম মেচিনটোৰ ওপৰতে আছিল। কিন্তু মহিলাগৰাকীৰ হাতত ভাৰতৰ পৰা উভতি যাবলৈ মাত্ৰ ৩৬ ঘণ্টাহে বাকী আছিল। দেওবাৰ হোৱাৰ বাবে কোনো কুৰিয়াৰ সেৱাও উপলব্ধ নাছিল। সেইদিনা ৰাতি মহিলাগৰাকীয়ে এটা ফোন কল পায় আৰু বাহিৰলৈ ওলাই আহিবলৈ কয়। বাহিৰলৈ আহি তেওঁ দেখে যে ডি এইচ এলৰ সেই কৰ্মচাৰীজন তেওঁৰ দুজন বন্ধুৰ সৈতে উপস্থিত আছে। তেওঁলোকে অট’ৰিক্সাৰে প্ৰায় ৬ ঘণ্টা যাত্ৰা কৰি কাৰ্ডখন নিজ হাততে দিবলৈ আহিছিল। এই অহা-যোৱা যাত্ৰাত তেওঁলোকৰ প্ৰায় ১৪ ঘণ্টা সময় লাগিছিল।

মহিলাগৰাকীয়ে যুৱকজনৰ এই কষ্টৰ বাবে টকা দিবলৈ বিচাৰিছিল, কিন্তু তেওঁ ল’বলৈ অস্বীকাৰ কৰে। তাৰ পৰিৱৰ্তে যুৱকজনে তেওঁক সেই টকাখিনি নিজৰ ভ্ৰমণত খৰচ কৰিবলৈ কয়। যুৱকজনৰ নাম আছিল কৃষ্ণা। এই কাহিনীটোৱে ইণ্টাৰনেটত সকলোৰে দৃষ্টি আকৰ্ষণ কৰিছে। বহুত মানুহে যুৱকজনৰ এই নিঃস্বাৰ্থ কৰ্মক প্ৰশংসা কৰিছে। ভাৰতৰ অতিথি দেৱো ভৱ নীতিৰ এই সুন্দৰ নিদৰ্শন দেখি সকলোৱে গৌৰৱ অনুভৱ কৰিছে আৰু কেৰালাক সঁচাকৈয়ে ঈশ্বৰৰ নিজৰ দেশ বুলি আখ্যা দিছে।