কুনো ৰাষ্ট্ৰীয় উদ্যানত দেখা পোৱা গ’ল বিৰল বন মেকুৰী; কেইবাদশকৰ পিছত বন্দী হ’ল কেমেৰাত

মধ্যপ্ৰদেশৰ কুনো ৰাষ্ট্ৰীয় উদ্যানত কেমেৰাত ধৰা পৰিছে এবিধ বিৰল প্ৰজাতিৰ বনৰীয়া মেকুৰী ‘কাৰাকাল’। এই বনৰীয়া জন্তুটোক কেইবাদশকৰ পিছত ভাৰতৰ মাটিত দেখা পোৱা গৈছে বুলি বন বিভাগে প্ৰকাশ কৰিছে। যোৱা ৫ জুন, বিশ্ব পৰিবেশ দিৱসত এই কথা নিশ্চিত কৰিছিল কুনো কৰ্তৃপক্ষই।

বিশেষজ্ঞসকলৰ মতে, কুনো ৰাষ্ট্ৰীয় উদ্যানৰ পৰিৱেশ যে বহুখিনি উন্নত হৈছে তাৰ এক ডাঙৰ প্ৰমাণ এই ঘটনা। মধ্যপ্ৰদেশৰ মুখ্যমন্ত্ৰী ড০ মোহন যাদৱে এই ঘটনাক ৰাজ্যৰ বন্যপ্ৰাণী সংৰক্ষণৰ ক্ষেত্ৰত এক বৃহৎ সফলতা বুলি অভিহিত কৰিছে।

‘কাৰাকেল’ বনৰীয়া মেকুৰীয়ে জোপোহাৰ মাজত লুকাই থাকি ভাল পায়। এই প্ৰাণীবিধক কিছুমান বিৰল বৈশিষ্ট্যৰ বাবে ‘তৃণভূমিৰ ভূত’ বুলিও জনা যায়। শেহতীয়াকৈ বন বিভাগৰ বিশেষ কেমেৰা ট্ৰেপত বন্দী হৈছে এই বনৰীয়া মেকুৰীটো। এই বনৰীয়া মেকুৰীটোৰ কাণত ডাঙৰ ডাঙৰ ক’লা চুলি থাকে। ইহঁত যথেষ্ট শক্তিশালী আৰু চিকাৰত পাকৈত। এসময়ত পশ্চিম আৰু মধ্য ভাৰতৰ বিশাল অঞ্চলত তেওঁলোকক দেখা পোৱা গৈছিল। কিন্তু বনাঞ্চল ধ্বংস আৰু ঘাঁহনি কমি যোৱাৰ বাবে ভাৰতত বৰ্তমান এই প্ৰাণীটো বিৰল।

মধ্যপ্ৰদেশৰ মুখ্যমন্ত্ৰী ড০ মোহন যাদৱে কয় যে ‘প্ৰজেক্ট চিতা’ৰ সফলতাৰ বাবে লোৱা কেইবাটাও পদক্ষেপৰ বাবে কুনোৰ পৰিৱেশ উন্নত হৈছে। ফলত কুনো ৰাষ্ট্ৰীয় উদ্যান কেৱল চিতাৰ বাবেই নহয়, বহু বিৰল প্ৰজাতিৰ প্ৰাণীৰ বাবেও নিৰাপদ হৈ পৰিছে। বন্যপ্ৰাণী বিশেষজ্ঞসকলৰ মতে, কাৰাকলৰ দৰে বৃহৎ চিকাৰী  প্ৰাণীৰ উপস্থিতিয়ে প্ৰমাণ কৰে যে কুনো অৰণ্যত এতিয়াও পৰ্যাপ্ত পৰিমাণৰ চিকাৰী প্ৰাণী আছে।

উল্লেখ্য যে আফ্ৰিকান চিতা অহাৰ পিছৰে পৰা আন্তঃৰাষ্ট্ৰীয় পৰ্যায়ত কুনো ৰাষ্ট্ৰীয় উদ্যানে যথেষ্ট দৃষ্টি আকৰ্ষণ কৰিছে। ইয়াৰ মাজত কাৰাকেল দেখা পোৱাটোৱে কুনোৰ জৈৱ বৈচিত্ৰ্যক আৰু অধিক বিশেষ কৰি তুলিছে। ইয়াৰ পূৰ্বে মধ্যপ্ৰদেশৰ গান্ধীসাগৰ অভয়াৰণ্যত এই বিৰল কাৰাকল দেখা গৈছিল। ভাৰতৰ ভিতৰতে বিলুপ্তপ্ৰায় বনৰীয়া মেকুৰীৰ ভিতৰত কাৰাকেল অন্যতম। সেয়ে বন বিভাগে  ইহঁতক বচাবলৈ আৰু ইহঁতৰ বাসস্থান সুৰক্ষিত কৰিবলৈ দেশত নিৰীক্ষণ বৃদ্ধি কৰি।