বিদেশত সক্ৰিয় ৩৬ হাজাৰ ভাৰতীয় চিম! উন্মোচিত হ’ল আন্তঃৰাষ্ট্ৰীয় চাইবাৰ জালিয়াতি চক্ৰ

ইডিয়ে ভাৰতৰ বিভিন্ন ঠাইত সংঘটিত হোৱা কমেও ১০০টা চাইবাৰ জালিয়াতিৰ  আৰ্হিৰ মিল বিচাৰি পাইছিল। বলবৎকাৰী সঞ্চালকালয়ে (ইডি) ১০০ কোটিৰো অধিক টকাৰ এই চাইবাৰ জালিয়াতিৰ তদন্তৰ সময়ত এটা আন্তঃৰাষ্ট্ৰীয় জালিয়াতি চক্ৰ উদ্ধাৰ কৰিছে।

বিদেশত ভাৰতীয় চিম ব্যৱহাৰ কৰা হৈছিল। তদন্তত প্ৰকাশ পাইছে যে কম্বোডিয়াৰ পৰা প্ৰায় ৩৬ হাজাৰ ভাৰতীয় মোবাইল চিম কাৰ্ড ব্যৱহাৰ কৰা হৈছিল। ইয়াৰে কমেও ৫৩০০ চিম চাইবাৰ জালিয়াতিত পোনপটীয়াকৈ ব্যৱহাৰ কৰা হৈছিল।

ৰাজস্থানৰ যোধপুৰ চাইবাৰ ক্ৰাইম আৰক্ষীয়ে দাখিল কৰা এফআইআৰৰ ভিত্তিত ইডিৰ তদন্ত আৰম্ভ হয়। অভিযোগ উত্থাপন হৈছিল যে অসাধু বিক্ৰেতাই কিছুমান পইণ্ট অৱ চেল (পি অ’ এছ) কাউণ্টাৰৰ পৰা অবৈধভাৱে চিম কাৰ্ড সক্ৰিয় কৰি অপৰাধীৰ হাতত গতাই দিছিল। তদন্ত আগবাঢ়ি যোৱাৰ লগে লগে আন্তঃৰাষ্ট্ৰীয় জালিয়াতি চক্ৰৰ সৈতে সম্পৰ্ক স্পষ্ট হৈ পৰিল।

তদন্তকাৰীয়ে জনোৱা মতে, ভাৰতত ভুৱা নথি-পত্ৰ ব্যৱহাৰ কৰি বা প্ৰৱঞ্চনামূলক মাধ্যমেৰে বহু মোবাইল ফোন নম্বৰ সক্ৰিয় কৰা হৈছিল। ইয়াৰ পিছতে মালয়েছিয়াৰ নাগৰিকৰ জৰিয়তে কম্বোডিয়ালৈ প্ৰেৰণ কৰা হয় চিম কাৰ্ড। তাৰ পৰাই প্ৰৱঞ্চকসকলে হোৱাটছএপ কল আৰু অন্যান্য ডিজিটেল প্লেটফৰ্ম ব্যৱহাৰ কৰি ভাৰতৰ বিভিন্ন ৰাজ্যৰ লোকক লক্ষ্য কৰি লয়।

ইডিয়ে প্ৰায় ২.৩ লাখ মোবাইল নম্বৰ বিশ্লেষণ কৰি দেখা পায় যে ইয়াৰে প্ৰায় ৩৬ হাজাৰ কম্বোডিয়াত সক্ৰিয় আছিল। তাতোকৈ চিন্তনীয় কথাটো হ’ল ইয়াৰে ৫৩০০খন চিমৰ বিৰুদ্ধে ইতিমধ্যে চাইবাৰ জালিয়াতিৰ অভিযোগ উত্থাপন হৈছে। তদন্তকাৰীৰ মতে, জালিয়াতিৰ ধনৰাশি ১০০ কোটি টকা অতিক্ৰম কৰিছে।

তদন্তত প্ৰকাশ পাইছে যে চিম বিক্ৰেতাৰ এটা অংশই দেশৰ বিভিন্ন প্ৰান্তৰ কম শিক্ষিত আৰু অজ্ঞাত লোকক লক্ষ্য কৰি লৈছিল। কেতিয়াবা পৰ্টিং নম্বৰৰ নামত কেতিয়াবা নতুন চিম দিয়াৰ প্ৰলোভন দি তেওঁলোকৰ পৰিচয় পত্ৰ সংগ্ৰহ কৰা হৈছিল। ইয়াৰ পিছত সেই নথি-পত্ৰ ব্যৱহাৰ কৰি বৃহৎ সংখ্যক চিম কাৰ্ড সক্ৰিয় কৰা হয়। তদন্তত প্ৰকাশ পাইছে যে প্ৰকৃত গ্ৰাহকৰ অজ্ঞাতে চিমসমূহ বিদেশলৈ সৰবৰাহ কৰি বিভিন্ন চাইবাৰ জালিয়াতিৰ বাবে ব্যৱহাৰ কৰা হৈছিল।

শেহতীয়াকৈ ইডিয়ে এই চক্ৰৰ সৈতে জড়িত থকাৰ সন্দেহত ৰাজস্থানৰ কিশনগড়, নগৌৰ, যোধপুৰ আৰু পঞ্জাৱৰ লুধিয়ানাত কেইবাটাও স্থানত তালাচী চলাইছিল। অভিযানৰ সময়ত গুৰুত্বপূৰ্ণ নথি-পত্ৰ, ডিজিটেল প্ৰমাণ আৰু বেংক একাউণ্টৰ সবিশেষ উদ্ধাৰ কৰা হয়। তদন্তকাৰীয়ে ধন সৰবৰাহৰ তদন্তও কৰি আছে।

চাইবাৰ সুৰক্ষা বিশেষজ্ঞসকলৰ মতে, যোৱা কেইবছৰমানৰ পৰা কম্বোডিয়া আন্তঃৰাষ্ট্ৰীয় অনলাইন জালিয়াতিৰ চক্ৰৰ অন্যতম ভিত্তি হৈ পৰিছে। বিভিন্ন দেশত বাস কৰা প্ৰৱঞ্চকে তাত কল চেণ্টাৰ আৰু অনলাইন কেলেংকাৰী নেটৱৰ্ক চলাই লাখ লাখ লোকক প্ৰতাৰণা কৰি আছে।

মন কৰিবলগীয়া যে চলিত বৰ্ষৰ এপ্ৰিল মাহত তেলেংগানা চাইবাৰ ছিকিউৰিটি ব্যুৰোৱে ২০২৩ চনৰ পৰা কম্বোডিয়ালৈ ৬০০ৰো অধিক ভাৰতীয় চিম কাৰ্ড সৰবৰাহ কৰা এটা চক্ৰ বিচাৰি পাইছিল।সেই কাণ্ডত পাঁচজন লোকক গ্ৰেপ্তাৰ কৰা হৈছিল। তদন্তকাৰীয়ে ধাৰণা কৰে যে বৰ্তমানৰ গোচৰটো আৰু বৃহত্তৰ আন্তঃৰাষ্ট্ৰীয় নেটৱৰ্কৰ অংশ।

ইডিৰ মতে, তদন্ত এতিয়াও প্ৰাৰম্ভিক পৰ্যায়ত আছে। এই চক্ৰটোৰ মাষ্টাৰমাইণ্ডসকলে বিদেশৰ পৰা এই চক্ৰটো পৰিচালনা কৰে। এতিয়া মূল প্ৰত্যাহ্বান হৈছে তেওঁলোকক চিনাক্ত কৰা। তদুপৰি জালিয়াতিৰ জৰিয়তে চুৰি হোৱা ধনৰ সন্ধান উলিওৱাৰ লগতে আৰু কিমান ভাৰতীয় চিম কাৰ্ড এই চক্ৰৰ হাতলৈ গৈছে সেই কথা জানিবলৈ চেষ্টা অব্যাহত আছে।