মন্দিৰৰ দানবাকচত আচৰিত প্ৰাৰ্থনা! ‘খুড়ীদেউৰ অত্যাচাৰ সহ্য নহয়, সোনকালে মৃত্যু দিয়ক’ – ২০ টকীয়া নোটত পুণ্যৰ্থীৰ আহ্বান

অন্ধ্ৰপ্ৰদেশৰ অনন্তপুৰ জিলাৰ সুব্ৰহ্মণ্যস্বামী মন্দিৰৰ দানপাত্ৰত উদ্ধাৰ হোৱা এখন ২০ টকীয়া নোটৰ ওপৰত লিখা এক অস্বাভাৱিক প্ৰাৰ্থনাক কেন্দ্ৰ কৰি বৰ্তমান ব্যাপক চাঞ্চল্যৰ সৃষ্টি হৈছে। সাধাৰণতে ধৰ্মীয় স্থানসমূহত ভক্তসকলে নিজৰ তথা পৰিয়ালৰ কুশল-মংগলৰ বাবে ঈশ্বৰৰ ওচৰত প্ৰাৰ্থনা জনায় যদিও এইগৰাকী অজ্ঞাত পুণ্যৰ্থীয়ে নিজৰ আত্মীয়ৰ দ্ৰুত মৃত্যু কামনা কৰি নোটখনৰ জৰিয়তে ঈশ্বৰলৈ আহ্বান জনাইছে।

মন্দিৰ কৰ্তৃপক্ষই জানিবলৈ দিয়া অনুসৰি, নিয়মীয়া কাম-কাজৰ অংশ হিচাপে দানবাকচৰ পৰা ধন সংগ্ৰহ কৰি থকাৰ সময়তে কৰ্মচাৰীসকলে এই বিশেষ ২০ টকীয়া নোটখন প্ৰত্যক্ষ কৰে। নোটখনত লিখা আছিল যে তেওঁ খুড়ীদেউৰ অত্যাচাৰ আৰু সহ্য কৰিব পৰা নাই, সেয়েহে অতি সোনকালেই যেন তেওঁৰ মৃত্যু হয়। প্ৰথম অৱস্থাত কৰ্মচাৰীসকলে বিষয়টো সঠিকভাৱে বুজিব পৰা নাছিল যদিও পাছত বাৰ্তাংশ ভালদৰে পঢ়ি তেওঁলোক স্তম্ভিত হৈ পৰে।

লগে লগে মন্দিৰৰ কৰ্মচাৰীসকলে সেই নোটখনৰ লগতে তাত লিখা বাৰ্তাটোৰ আলোকচিত্ৰ গ্ৰহণ কৰি সামাজিক মাধ্যমত প্ৰচাৰ কৰে। মন্দিৰ কৰ্তৃপক্ষই প্ৰকাশ কৰা মতে, ইয়াৰ পূৰ্বেও তেওঁলোকে দানবাকচৰ পৰা ধন সংগ্ৰহ কৰি আহিছে যদিও এনেধৰণৰ অস্বাভাৱিক আৰু মৃত্যু কামনা কৰি লিখা কোনো বাৰ্তা পূৰ্বে কেতিয়াও উদ্ধাৰ হোৱা নাছিল।

বৰ্তমান এই সমগ্ৰ বিষয়টো সামাজিক মাধ্যমত দ্ৰুতগতিত বিয়পি পৰাৰ লগতে ৰাইজৰ মাজত তীব্ৰ চৰ্চাৰ বিষয় হৈ পৰিছে। এগৰাকী ব্যক্তিয়ে কি পৰিস্থিতিত পৰি বা কিমান মানসিক নিৰ্যাতনৰ বলি হৈ এখন পৱিত্ৰ ধৰ্মীয় স্থানত গৈ এনেদৰে আত্মীয়ৰ মৃত্যু কামনা কৰিবলগীয়া হৈছে, সেয়া এতিয়া সকলোৰে বাবে এক চিন্তনীয় বিষয় হিচাপে বিবেচিত হৈছে।