সদনত মুখ্যমন্ত্ৰীৰ ডাঙৰ ঘোষণা  : ১৪টা সমষ্টিত গঠন হ’ব নতুন ৰাজহচক্র

অসম বিধানসভাত মুখ্যমন্ত্ৰী ড০ হিমন্ত বিশ্ব শৰ্মাই ৰাজ্যৰ ৰাজহ প্ৰশাসন পুনৰ্গঠনৰ ক্ষেত্ৰত এক গুৰুত্বপূৰ্ণ ঘোষণা কৰে। তেওঁ স্পষ্টকৈ কয় যে, আগন্তুক সময়ত পঞ্চায়তৰ সীমাৰ দৰে প্ৰতিটো বিধানসভা সমষ্টিৰ ভিতৰতে সংশ্লিষ্ট ৰাজহচক্র থাকিব। যিসমূহ সমষ্টিৰ নিজা ৰাজহচক্র নাই, সেইসমূহত নতুনকৈ ৰাজহচক্র গঠন কৰা হ‘ব। এই সিদ্ধান্তৰ মূল উদ্দেশ্য হৈছে ৰাজহ প্ৰশাসনক অধিক সুসংগঠিত, জবাবদিহিমূলক আৰু জনমুখী কৰি তোলা।

মুখ্যমন্ত্ৰীয়ে সদনত জনোৱা মতে, বৰ্তমান অসমৰ বহু সমষ্টিত ৰাজহচক্রৰ ভৌগোলিক সীমা বিধানসভা সমষ্টিৰ সীমাৰ সৈতে মিল নাথাকে। ফলত ভূমি-সম্পৰ্কীয় কাম-কাজ, খাজনা, নামজাৰী, পট্টা, দুৰ্যোগ ব্যৱস্থাপনা, নিৰ্বাচনী প্ৰস্তুতি, চৰকাৰী আঁচনিৰ ৰূপায়ণ আদিত প্ৰশাসনিক জটিলতা সৃষ্টি হয়। এই অসুবিধা দূৰ কৰাৰ উদ্দেশ্যে চৰকাৰে ১০৮টা বিধানসভা সমষ্টিত ৰাজহচক্রৰ সীমা সমষ্টিৰ সীমাৰ সৈতে সমন্বয় কৰাৰ সিদ্ধান্ত গ্ৰহণ কৰিছে। লগতে ৰাজহচক্রবিহীন ১৪টা বিধানসভা সমষ্টিত একোটাকৈ নতুন ৰাজহচক্র স্থাপন কৰা হ‘ব।

মুখ্যমন্ত্ৰীয়ে সদনত এইটোও জানিবলৈ দিয়ে যে, ৰাজহচক্র নথকা সমষ্টিসমূহৰ তালিকা ইতিমধ্যে প্ৰস্তুত কৰা হৈছে। সকলো জিলা আয়ুক্তলৈ এই সন্দৰ্ভত প্ৰয়োজনীয় নিৰ্দেশনা জাৰি কৰা হৈছে। বৰ্তমান বান পৰিস্থিতিৰ বাবে কিছু কাম বিলম্বিত হৈছে যদিও বান পৰিস্থিতি স্বাভাৱিক হোৱাৰ এসপ্তাহৰ ভিতৰত প্ৰথম পৰ্যায়ৰ কাম সম্পূৰ্ণ কৰিবলৈ চৰকাৰে নিৰ্দেশ দিছে। তেওঁ কয় যে, এই সমগ্ৰ প্ৰক্ৰিয়াটো চৰকাৰে তাৎক্ষণিকভাৱে আৰম্ভ কৰিছে আৰু ইয়াক অগ্ৰাধিকাৰ ভিত্তিত সম্পন্ন কৰা হ‘ব।

এই ঘোষণাৰ সময়ত মুখ্যমন্ত্ৰীয়ে এক ৰাজনৈতিক বাৰ্তাও প্ৰেৰণ কৰে। তেওঁ স্পষ্টকৈ কয় যে, এই পুনৰ্গঠন চৰকাৰৰ নীতি-নির্ধাৰণমূলক সিদ্ধান্ত; সেয়ে কোনো বিধায়কে নিজ নিজ সমষ্টিত ইয়াৰ ৰাজনৈতিক কৃতিত্ব ল‘ব নালাগে। তেওঁৰ মতে, ই ৰাজ্যজুৰি একে নীতি অনুসৰি গ্ৰহণ কৰা প্ৰশাসনিক সংস্কাৰ, ব্যক্তিগত বা আঞ্চলিক সফলতা নহয়।

ৰাজহচক্র হৈছে অসমৰ ভূমি প্ৰশাসনৰ আটাইতকৈ গুৰুত্বপূৰ্ণ ক্ষেত্ৰীয় একক। ভূমি পট্টা, নামজাৰী, মিউটেচন, ভূমি-অধিগ্ৰহণ, চৰ এলেকাৰ নথিভুক্তি, চৰকাৰী ভূমি সংৰক্ষণ, দুৰ্যোগৰ ক্ষতিপূৰণ, বান সাহায্য, ভোটাৰ তালিকাৰ বহু প্ৰশাসনিক সমন্বয় আদি কাম ৰাজহচক্রৰ জৰিয়তেই সম্পন্ন হয়।

বিগত কেইবাবছৰ ধৰি বহু বিধানসভা সমষ্টিৰ অংশ বিভিন্ন ৰাজহচক্রত বিভক্ত হৈ থকাৰ অভিযোগ উত্থাপিত হৈছিল। ইয়াৰ ফলত এখন সমষ্টিৰ বিধায়ক, জিলা প্ৰশাসন আৰু ৰাজহ বিভাগৰ মাজত সমন্বয়ৰ অভাৱ দেখা দিছিল। বহু ক্ষেত্ৰত এখন গাঁৱৰ মানুহে এটা কামৰ বাবে ভিন্ন ৰাজহচক্র কাৰ্যালয়ত যাবলগীয়া হৈছিল।