আবকাৰী মন্ত্ৰীয়ে নিজেই ৰোলাৰ চলাই চূৰ্ণাকৃত কৰিলে অবৈধ সুৰাৰ বটল

মহানগৰীৰ গড়চুকত আজি বহু পৰিমাণৰ অবৈধভাৱে সৰবৰাহ কৰা সুৰাৰ বটল ধ্বংস কৰা হয়। ধ্বংস কৰে আবকাৰী মন্ত্ৰী পৰিমল শুক্লবৈদ্যই নিজেই শ শ বটলৰ ওপৰত ৰোলাৰ চলাই।

উল্লেখযোগ্য যে বিজেপি নেতৃত্বাধীন অসম চৰকাৰখনে শাসনলৈ অহাৰ পিছতে সুৰাৰ বিক্ৰীৰ পৰা ৰাজহ বৃদ্ধিৰ চেষ্টা কৰাৰ সমান্তৰালভাৱে অবৈধ সুৰাৰ প্ৰচলনত কঠোৰ দৃষ্টি ৰাখিছে। অবৈধ সুৰাৰ পৰা যাতে চৰকাৰৰ ৰাজহ নেহেৰায়, তাৰ বাবে আবকাৰী বিভাগে বিভিন্ন সময়ত অবৈধ সুৰা জব্দ কৰি আহিছে।

কিন্তু আজি আবকাৰী মন্ত্ৰী পৰিমল শুক্লবৈদ্যই অবৈধ সুৰাৰ বটলৰ ওপৰত নিজে ৰোলাৰ চলাই আন এক নজিৰ স্থাপন কৰিলে। অৱশ্যে মন্ত্ৰীজনৰ কাণ্ডই বিতৰ্কৰো সূত্ৰপাত ঘটাইছে। বহু সংখ্যক লোকে মন্ত্ৰীজনৰ এই কাণ্ডক ‘নাটক’ আখ্যা দিছে।

উল্লেখযোগ্য যে যোৱা দুটা বছৰত আবকাৰী বিভাগ আৰু আৰক্ষীয়ে জব্দ কৰা বৃহৎ পৰিমাণৰ অবৈধ সুৰা বেছিভাগেই অৰুণাচলৰ পৰা অসমলৈ অবৈধভাৱে সৰবৰাহ কৰা। অবৈধ সুৰা সৰবৰাহ কৰাৰ অপৰাধত সুৰা ব্যৱসায়ী ৰাজেশ জালানসহ ১৩জন লোকক গ্ৰেপ্তাৰ কৰা হৈছিল।

আনহাতে আদালতৰ নিৰ্দেশ ক্ৰমে এই অবৈধ সুৰাৰ বটলবোৰ পৰ্য্যায়ক্ৰমে ভাঙি থকা হৈছে বুলি জানিবলৈ দিয়ে আবকাৰী বিভাগৰ সূত্ৰই।