অৰুণাচলত আপছুৰ অপাৰেশ্যন ক্লীন ড্ৰাইভ : আইন বিৰুদ্ধ ঘোষণা ৰাজ্য প্ৰশাসনৰ

অৰুণাচল প্ৰদেশত আপছুৱে আৰম্ভ কৰা অপাৰেশ্যন ক্লীন ড্ৰাইভে ৰাজ্যখনত বসবাস কৰি থকা অনা অৰুণাচলী লোকসকলৰ মাজত আতংকৰ সৃষ্টি কৰিছে। শনিবাৰেও আপছুৱে এই অভিযান অব্যাহত ৰখাৰ পিছত অনা অৰুণাচলী লোকসকলে ভয়-শংকাত সময় পাৰ কৰিছে।

বাহিৰৰ পৰা আহি বাস কৰি থকা এই লোকসকলে যিকোনো সময়তে ৰাজ্যখন ত্যাগ কৰিবলগীয়া হ’ব পাৰে বুলি শংকিত হৈ পৰিছে। আপছুৱে দেশৰ লগতে অৰুণাচলৰ স্বাৰ্থত এন আৰ চি উন্নীতকৰণৰ যি দাবী উত্থাপন কৰিছিল তাৰ প্ৰতি চৰকাৰে কোনো সঁহাৰি নিদিয়াৰ পৰিপ্ৰেক্ষিতত সংগঠনটোৱে পূৰ্বে ঘোষণা কৰি অনুসৰি ৰাজ্যখনত শুকুৰবাৰৰ পৰা অপাৰেশ্যন ক্লীন ড্ৰাইভ আৰম্ভ কৰে।

আপছুৱে শুকুৰবাৰে আৰম্ভ কৰা অপাৰেশ্যন ক্লীন ড্ৰাইভত এতিয়ালৈকে এহেজাৰৰো অধিক আন্ত:ৰাজ্যিক পাৰপত্ৰ নথকা তথা কোনো তথ্য পাতি নথকা বৈধ ভাৰতীয় লোকক আটক কৰি আৰক্ষীক গতাই দিয়ে। ইপিনে আৰক্ষীয়ে এই সন্দেহজনক লোকসকলক অসমত মুকলি কৰি দিয়ে। ইয়াৰ লগতে অৰুণাচল প্ৰদেশত চাকৰি কৰি থকা কৰ্মচাৰীসকলকো আপছুৱে হাৰাশাস্তি কৰাৰ অভিযোগ উত্থাপিত হৈছে।

জানিব পৰা মতে আপছুৰ এই অপাৰেশ্যন ক্লীন ড্ৰাইভত ৰাজ্যখনৰ আন এটা ছাত্ৰ সংগঠন ওৱাংচু ছাত্ৰ সন্থায়ো সম্পূৰ্ণ সহযোগিতা আগবঢ়াইছে। সৰ্বাধিক সন্দেহজনক লোক থকা বুলি অৰুণাচলৰ কানুবাৰীত প্ৰশাসনক চোকা দৃষ্টি ৰাখিবলৈ আপছুৱে দাবী জনাইছে। ইপিনে ৰাজ্যখনৰ ১৮ জিলাত একেলগে এই অপাৰেশ্যন ক্লীন ড্ৰাইভ চলোৱা বুলি আপছুৱে জানিবলৈ দিছে।

আনহাতে, অৰুণাচল ৰাজ্যিক প্ৰশাসনে আপছুৰ এই অপাৰেশ্যন ক্লীন ড্ৰাইভক আইন বিৰুদ্ধ বুলি অভিহিত কৰিছে। পাপুমপাৰেৰ উপায়ুক্তই জানিব দিয়ে যে ‘বেংগল ইষ্টাৰ্ণ ৰেগুলেশ্যন আইন ১৮৭৩’ৰ বিপৰীতে আপছুৱে আইন হাতত তুলি লোৱাটো আইন বিৰোধী কাম।