ষাঠিবছৰ গৰকা অসম ৰাজ্যিক চিৰিয়াখানা পৰ্য্যায়ক্ৰমে ধ্বংস কৰা শক্তিৰ নেতৃত্ব লৈছে চিৰিয়াখানা ডি এফ অ’ই : অদীপ ফুকন

“ষাঠিবছৰ গৰকা অসম ৰাজ্যিক চিৰিয়াখানাৰ পৰ্য্যায়ক্ৰমে ধ্বংসৰ বাবে এটা শক্তি জড়িত হৈ পৰিছে। এই শক্তিৰ নেতৃত্ব লৈছে স্বয়ং ডি এফ অ’গৰাকীয়ে।”

আজি চিৰিয়াখানা সুৰক্ষা মঞ্চৰ চিৰিয়াখানাৰ সমীপতে থকা কাৰ্য্যালয়ত এখন সংবাদমেল অনুষ্ঠিত কৰি ডি এফ অ’ টেজচ মৰিস্বামীৰ বিৰুদ্ধে এই গুৰুতৰ অভিযোগ তোলে জ্যেষ্ঠ সাংবাদিক অদীপ ফুকনে।

উল্লেখ্য যে, চিৰিয়াখানা সুৰক্ষা মঞ্চই দীৰ্ঘদিন ধৰি চিৰিয়াখানাখনত অনিয়ম তথা কেলেংকাৰি চলি থকাৰ বাবে জীৱ-জন্তুবিলাকে ব্যাপক হাৰত মৃত্যুক সাবটি লোৱা বুলি অভিযোগ তুলি থকা সময়তে জ্যেষ্ঠ সাংবাদিকগৰাকীয়ো চিৰিয়াখানাৰ কেলেংকাৰিৰ বিৰুদ্ধে সৰৱ হৈ পৰিছে।

আনহাতে, উক্ত সংবাদমেলতে তেওঁ ১৯৫৮ চনতে স্থাপিত হোৱা চিৰিয়াখানাখন যোৱা ৬০ বছৰে ক্ৰমাৎ ধ্বংসৰ ফালে গতি কৰি আছে বুলি সদৰী কৰি তেওঁ লগতে কয় “চিৰিয়াখানাৰ ভিতৰত থকা ডি এফ অ’ এগৰাকীক লুণ্ঠন চলাবলৈ কৰ্তৃত্ব দিয়া হৈছে।”

ইয়াৰোপৰি এই লুণ্ঠনে এনে এটা পৰ্য্যায় পোৱাৰ বাবে মুখ্য মন্ত্ৰী নিজে আহি চিৰিয়াখানাত আহি চাবলগীয়া হৈছে বুলি তেওঁ কয়। তেওঁ লগতে কয় “এই কথাই এটা কথা স্পষ্ট কৰে অসম ৰাজ্যিক চিৰিয়াখানাত সাংঘাটিক কেলেংকাৰি চলি আছে।”

আনহাতে, এই কেলেংকাৰিৰ বিৰুদ্ধে ৰাজহুৱাভাৱে অভিযোগ কৰি থকা হৈছে যদিও কোনো ধৰণৰ ব্যৱস্থা গ্ৰহণ কৰা নাই বুলি তেওঁ কয়।

তেওঁৰ মতে, “এইক্ষেত্ৰত চৰকাৰৰ ষড়যন্ত্ৰ থকা বুলি এটা কাৰণেই বাঢ়ি গৈছে যে এটা সময়ত খানাপাৰাস্থিত কৃষি বিশ্ববিদ্যালয়ৰ মাটি এখন ৫ ষ্টাৰ হোটেল কৰাৰ বাবে চেষ্টা কৰি থকা হৈছিল, আমি প্ৰতিবাদ কৰাৰ পাছতো হোটেলখন খুলিবৰ কাৰণে মাটি দি দিয়া হ’ল। একেই প্ৰক্ৰিয়াৰে চিৰিয়াখানাত থকা ১৭৫ হেক্টৰ মাটি কোনো ব্যক্তিগত খণ্ডৰ হাতত গতাই ডাঙৰ ব্যৱসায়িক প্ৰতিষ্ঠান গঢ় দিয়াৰ চেষ্টা কৰা হৈছে বুলি আমাৰ সন্দেহ আহিছে।”

আনহাতে, ২০১৭ চনৰ ১ ছেপ্তেম্বৰত চিৰিয়াখানা কৰ্তৃপক্ষই দিয়া তথ্য অনুসৰি চিৰিয়াখানাত ১১৮টা প্ৰজাতিৰ ১২২৩টা জীৱ-জন্তু আছিল বুলি তেওঁ সংবাদমেলত কয়। আনহাতে তাৰ বিপৰীতে ইণ্টাৰনেটত থকা তথ্য অনুসৰি মাত্ৰ ১১৪ বিধ প্ৰজাতিৰ জীৱ-জন্তুহে আছে বুলি তেওঁ জানিবলৈ দিয়ে। লগতে আৰ টি আই তথ্যত প্ৰদান কৰা ১২২৩টা জীৱ-জন্তুৰ পৰিৱৰ্তে ৮৯৫টা জীৱ-জন্তু চিৰিয়াখানাত আছে বুলি ইণ্টাৰনেটত উল্লেখ থকা বুলি তেওঁ কয়।

এইক্ষেত্ৰত ১২২৩ টা জীৱ-জন্তুৰ পৰা ৩২৮ টা জীৱ-জন্তু কেনেকৈ কমিল বুলি তেওঁ চিৰিয়াখানা কৰ্তৃপক্ষক প্ৰশ্ন কৰে।

ঠিক সেইদৰে অসম চৰকাৰকো তথ্য বিভ্ৰাট সন্দৰ্ভত স্পষ্টীকৰণ দিয়াৰ বাবে সাংবাদিকগৰাকীয়ে দাবী কৰে ।

তেওঁ লগতে অসম ৰাজ্যিক চিৰিয়াখানাখনৰ জীৱ-জন্তুৰ ৰাজহুৱা গণনা কৰিবৰ বাবে দাবী উত্থাপন কৰাৰ লগতে কয়, “এই ৰাজহুৱা গণনাৰ তথ্য ৰাইজে জনাকৈ চিৰিয়াখানাত ৰাখি থ’ব লাগে।”

আনহাতে, বৰ্তমান অসম ৰাজ্যিক চিৰিয়াখানাখনৰ জীৱ-জন্তু, চৰাই-চিৰিকটিবিলাকক লেতেৰা খোৱাপানী যোগান ধৰা হয় বুলি তেওঁ গুৰুতৰ অভিযোগ তোলে।

ইয়াৰোপৰি, চিৰিয়াখানা কৰ্তৃপক্ষই জনোৱা অনুসৰি কেনাইন ডিচটেম্পাৰ নামৰ ভাইৰাচবিধ কেনেকৈ চিৰিয়াখানালৈ আহিবলৈ পালে বুলি তেওঁ প্ৰশ্ন কৰাৰ লগতে কয় যে কি কাৰণত বাহিৰৰ পৰা জন্তুবিলাক চিৰিয়াখানালৈ আনোতে বাহিৰতে পৰীক্ষা নকৰাকৈ অনা হ’ল?

ইয়াৰোপৰি, কেনাইন ডিচটেম্পাৰ ভাইৰাছ সন্দৰ্ভত জ্যেষ্ঠ সাংবাদিকগৰাকীয়ে উচ্চস্তৰীয় তদন্ত দাবী কৰাৰ লগতে ইয়াৰ লগত জড়িতসকলক উচিত শাস্তি প্ৰদানৰ বাবে চৰকাৰক দাবী জনায়।

উল্লেখ্য যে, ফুকনে চিৰিয়াখানাৰ জন্তুবিলাকক খাদ্যৰ যোগান কমকৈ ধৰা বুলি অভিযোগ তুলি তেওঁ কয় “জন্তুবিলাকক খাদ্য যোগান কমকৈ ধৰি ধ্বংসৰ গৰাহলৈ থেলি দিব বিচাৰিছে আৰু ইয়াৰ ঠাইত বাণিজ্যিক ক্ষেত্ৰ গঢ়ি তুলিব বিচাৰিছে।”

তেওঁ লগতে তথ্য দাঙি ধৰি কয়, “২০১৭ চনত একেখিনি জীৱ-জন্তুকে যোগান ধৰি অহা খাদ্যসমূহ এতিয়া কমকৈ যোগান ধৰা হৈছে। ২০১৭ চনত প্ৰত্যেক দিনা জীৱ-জন্তুবোৰক ছাগলী মাংসৰ প্ৰয়োজন আছিল ৩৩.৯ কেজি। কিন্তু ২০১৮ চনত সেই মাংসৰ পৰিমাণ আধাতকৈও কমি ১৪.৪ কিল’গ্ৰাম হ’লগৈ। ২০১৭ চনত হাড় নথকা মাংসৰ পৰিমাণ আছিল ৩.৩ কেজি, কিন্তু চলিত বৰ্ষত এই পৰিমাণ কমাই মাত্ৰ ০.৬ কেজি কৰা হৈছে।”

তেওঁ লগতে কয় “হৰিণাৰ কাৰণে প্ৰত্যেকদিনে গছৰ পাতৰ প্ৰয়োজন হয় ৪৭.৭২ কুইণ্টল, কিন্তু এই পৰিমাণ কমাই ১১.৮৬ কুইণ্টললৈ নমাই অনা হৈছে।”

জীৱ-জন্তুবোৰক খাদ্যৰ পৰিমাণ ক্ৰমান্বয়ে কমাই অনাৰ অধিকাৰ চিৰিয়াখানা কৰ্তৃপক্ষ নাইবা চৰকাৰৰ নাই।

আনহাতে, উক্ত সংবাদমেলৰ জৰিয়তে ফুকনে পূৰ্বতে পশু-পক্ষীসকলক প্ৰদান কৰা খাদ্যসমূহ প্ৰদান কৰিবৰ বাবে চিৰিয়াখানা কৰ্তৃপক্ষক আহ্বান জনায়।

তেওঁ লগতে চিৰিয়াখানাখনৰ চাৰিওকাষৰ তিনিটা স্থানত ভাঙি থকা দেৱালসমূহ অনতিপলমে নিৰ্মাণৰ বাবে  চিৰিয়াখানা কৰ্তৃপক্ষক আহ্বান জনায় যাতে হৰিণাকে ধৰি অন্যান্য জীৱ-জন্তুসমূহ চিৰিয়াখানাৰ পৰা বাহিৰ ওলাই যাব নোৱাৰে।