নামৰূপ সাহিত্য কাননৰ উদ্যোগত অনুষ্ঠিত কবিতা আবৃত্তি কৰ্মশালাৰ সফল সমাপ্তি

নামৰূপ সাহিত্য কাননৰ উদ্যোগত অনুষ্ঠিত ৩ দিনীয়া কবিতা আবৃত্তি কৰ্মশালাখন আজি সমাপ্ত হৈছে। নামৰূপ সাহিত্য সভা সভাগৃহত এই কৰ্মশালাৰ আয়োজন কৰা হৈছিল।

এই কৰ্মশালাখন আগষ্টৰ ২৭ তাৰিখৰ পৰা আৰম্ভ কৰা হৈছিল। বিখ্যাৎ কবি, সাহিত্যিক, আবৃত্তিকাৰ যোৰহাট ঢেকীয়াখোৱাৰ শান্তিচায়া শইকীয়াৰ পথ প্ৰদৰ্শনাত এই কৰ্মশালাখনৰ আয়োজন কৰা হৈছিল। ইয়াত ৫০ গৰাকীয়ে অংশগ্ৰহণ কৰিছিল।

কৰ্মশালাখনত বিশেষকৈ আবৃত্তিৰ সময়ত উচ্চাৰণ, বিভিন্ন শব্দৰ গঠন, বিভিন্ন শব্দৰ কথনভংগী, কণ্ঠ নিয়ন্ত্ৰণ আদিৰ ওপৰত মনোযোগ প্ৰদান কৰা হৈছিল।

সামৰণিৰ দিনা নামৰূপ সাহিত্য কাব্য কাননৰ প্ৰতিষ্ঠাপক তথা বিখ্যাৎ কবি জিতুমণি শইকীয়াই আঁত ধৰিছিল। বিভিএফচিএলৰ উপ মহা প্ৰবন্ধক (মানৱ সম্পদ) ৰোহিনী কান্ত শৰ্মা, বিভিএফচিএলৰ মুখ্য প্ৰশাসনিক বিষয়া প্ৰণব কুমাৰ ভট্টাচাৰ্যই মুখ্য অতিথি আৰু সন্মানীয় অতিথি হিচাপে উপস্থিত আছিল।

সমালয় কবি চক্ৰৰ সভানেত্ৰী ৰূপালী মহন্ত পাটগিৰী, সামান্য মহিলা সমিতিৰ সভানেত্ৰী বিবি মহন্ত, বৃহত্তৰ অসমীয়া মহিলা মঞ্চৰ সভানেত্ৰী গৌৰা ছুবেদাৰ বৰা, নামৰূপ শিক্ষক প্ৰশিক্ষণ মহাবিদ্যালয়ৰ অধ্যক্ষস্মৃতি দত্ত বৰা, বিখ্যাত কবি অনিমা দেউৰী, অলিমণি দত্ত, ইলা শৰ্মা গোস্বামী, ছাজিদ আলী, কাৰ্তিক তালুকদাৰ, স্মৃতিৰেখা কলিতা, বৰ্ণালী বুঢ়াগোহাঞি ইত্যাদিয়ে অংশগ্ৰহণ কৰিছিল।

কৰ্মশালাখনৰ সমল ব্যক্তি শান্তিচায়া শইকীয়াক নামৰূপ কাব্য কাননৰ কৰ্মকৰ্তাসকলে চেলেং-চাদৰ আৰু সঁফুৰাৰে মান ধৰে। এই কৰ্মশাখনৰ প্ৰধান উদ্দেশ্য আছিল আমাৰ মাতৃভাষাৰ উন্নতি সাধন কৰা।