পুৰণিগুদাম এ এছ ই বিৰ কৰ্মচাৰীক মাৰপিটৰ ঘটনাৰ লগত জড়িত এজন দুৰ্বৃত্তক কৰায়ত্ত

নগাঁও জিলাৰ চামগুৰি এ এছ ই বিৰ উপ সংমণ্ডল বিষয়া কাৰ্যালয়ৰ অন্তৰ্গত পুৰণিগুদাম স্থিত এ এছ ই বি কাৰ্যালয়ৰ কৰ্মচাৰীক দুৰ্বৃত্তই কাৰ্যালয়তে মাৰপিট কৰা ঘটনাৰ এজন পলাতক অপৰাধীক আৰক্ষীই কৰায়ত্ত কৰিবলৈ সক্ষম হয়।

জানিব পৰা মতে শনিবাৰে আগবেলা ভাগত পুৰণিগুদাম আৰু চামগুৰি আৰক্ষীয়ে পুৰণিগুদাম ন-আলিমুৰত গোপন সূত্ৰৰ পম খেদি অভিযান চলাই এজন অপৰাধীক নিজ গৃহৰ পৰা কৰায়ত্ত কৰিবলৈ সক্ষম হয়। গ্ৰেপ্তাৰ হোৱা অপৰাধীজনৰ নাম হ’ল চমিৰুল হ’ক ওৰফে বাবুল (৩৮)।

উল্লেখ্য যে যোৱা ২৭ আগষ্টৰ সন্ধিয়া কেইবাজনো দুৰ্বৃত্তই পুৰণিগুদামস্থিত এ এছ ই বিৰ কাৰ্যালয়ত কৰ্মৰত কৰ্মচাৰী স্বতি বৰা আৰু ৰঞ্জিত তামুলীক প্ৰহাৰ কৰি গুৰুতৰভাৱে আহত কৰে। পৰবৰ্তী সময়ত আঁহত পৰিয়ালে চামগুৰি আৰক্ষী থানাত এজাহাৰ দাখিল কৰে।

উক্ত এজাহাৰৰ ভিত্তিত শনিবাৰে আৰক্ষীয়ে অভিযান চলাই এজন অপৰাধীক কৰায়ত্ত কৰে যদিও গোচৰ ৰুজু হৈ থকা আন এজন অপৰাধী চমিৰুল হ’কৰ  একে গাঁৱৰে ন- আলিমুৰৰ কালিম উদ্দিনক কৰায়ত্ব কৰিবলৈ সক্ষম হোৱা নাই।