এন আৰ চিৰ নামত ৰাজ্যত সংখ্যালঘুক হাৰাশাস্তি কৰাৰ বিৰুদ্ধে নতুন দিল্লীৰ যন্তৰ মন্তৰত প্ৰতিবাদ

অসমত এন আৰ চিৰ নামত সংখ্যালঘু লোকক হাৰাশাস্তি কৰাৰ অভিযোগ তুলি ছচিয়েল ডেম’ক্ৰেটিক পাৰ্টি অফ ইণ্ডিয়া নামৰ সংগঠনটোৰ নেতৃত্বত কেইবা শতাধিক লোকে দেওবাৰে নতুন দিল্লীৰ যন্তৰ মন্তৰত প্ৰতিবাদ সাৱ্যস্ত কৰে।

এন আৰ চি উন্নীতকৰণৰ ফলত অসমত বসবাস কৰি থকা সংখ্যালঘু লোকসকল অঘৰী হ’বলৈ ওলাইছে বুলি অভিযোগ তোলাৰ লগতে প্ৰতিবাদকাৰীসকলে সংখ্যালঘু লোকৰ ওপৰত হাৰাশাস্তি বন্ধ কৰাৰ দাবীত তুলি এই প্ৰতিবাদ সাৱ্যস্ত কৰে।

বিজেপি আৰু আৰ এছ এছে এন আৰ চিকলৈ অসমত ৰাজনীতি আৰম্ভ কৰিছে বুলি ব্যক্ত কৰে ছচিয়েল ডেম’ক্ৰেটিক পাৰ্টি অফ ইণ্ডিয়াৰ উপসভাপতি ছৰিফুদ্দিন আহমেদে। তেওঁ কয় যে ইয়াৰ বাবেই এন আৰ চিত অসমৰ বহুসংখ্যক থলুৱা লোকৰ নাম অন্তৰ্ভুক্ত হোৱা নাই।

আহমেদে কয় যে সংখ্যালঘু লোকসকলক লক্ষ্য কৰিয়েই বিজেপিয়ে এন আৰ চি উন্নীতকৰণৰ কাম আৰম্ভ কৰিছে। এন আৰ চিৰ বিৰুদ্ধে সংগঠনটোৱে দেশৰ প্ৰতিখন ৰাজ্যৰ ৰাজধানীতে প্ৰতিবাদ সাৱ্যস্ত কৰিব বুলিও তেওঁ কয়।

ইতিমধ্যে এন আৰ চি উন্নীতকৰণ প্ৰক্ৰিয়া বন্ধ কৰাৰ দাবীত নতুন দিল্লীত কেইবাবাৰো প্ৰতিবাদী কাৰ্যসূচী ৰূপায়ন হৈছে।