আজি ৯২ সংখ্যক ওপজা দিনত সুধাকণ্ঠলৈ আছুৰ শ্ৰদ্ধাঞ্জলি

আজি বিশ্বৰত্ন ড০ ভূপেন হাজৰিকাৰ ৯২ সংখ্যক ওপজা দিন। সমগ্ৰ ৰাজ্যতে আজি অসমবাসীয়ে বিশ্ববিশ্ৰুত শিল্পীগৰাকীলৈ শ্ৰদ্ধা নিবেদন কৰিছে।

মহানগৰীৰ দীঘলীপুখুৰীপাৰত থকা সুধাকণ্ঠ ড০ ভূপেন হাজৰিকাই নিজে উন্মোচন কৰা প্ৰতিমূৰ্তিত শ্ৰদ্ধা নিবেদন কৰে আছুৰ উপদেষ্টা ড০ সমুজ্জ্বল কুমাৰ ভট্টাচাৰ্য, সভাপতি দীপাংক কুমাৰ নাথ, সাধাৰাণ সম্পাদক লুৰীন জ্যোতি গগৈয়ে।

সংগীতসূৰ্যলৈ শ্ৰদ্ধাঞ্জলি জনাই আছুৰ উপদেষ্টা সমুজ্জ্বল ভট্টাচাৰ্যই কয়, “ভূপেন দাই আমাক সমাজখনক আগুৱাই নিবলৈ তেখেতৰ সৃষ্টিৰ মাজেৰেই সকলো সকলো সমল দি গৈছে। আমি সেইসমূহক হৃদয়ংগম কৰি আগুৱাই যাব লাগিব। আমি তাৰ বাবে কাম কৰিব লাগিব।‘’

ভট্টাচাৰ্যই লগতে ড০ ভূপেন হাজৰিকাৰ সমাধিক্ষেত্ৰ আজিলৈ সম্পূৰ্ণ হৈ নুঠাক লৈ আক্ষেপ প্ৰকাশ কৰে। এই ক্ষেত্ৰত চৰকাৰৰ অৱহেলাক তেওঁ ধিক্কাৰ দিয়ে।

সমাধি ক্ষেত্ৰ আহল বহলকৈ নিৰ্মাণ কৰা, ড০ ভূপেন হাজৰিকা গৱেষণা প্ৰতিষ্ঠান নিৰ্মাণ কৰা, ড০ ভূপেন হাজৰিকাৰ সৃষ্টিসমুহ পাঠ্যপুথিত অন্তৰ্ভুক্ত কৰা, ড০ ভূপেন হাজৰিকাৰ নামত এখন সাংস্কৃতিক ৰে’লৰ ব্যৱস্থা কৰাৰ লগতে আছুৱে উত্তৰ পূৰ্বাঞ্চলত থকা ৰে’লৰ টাৰ্মিনেলসমুহ ভূপেন হাজৰিকাৰ নামত উৎসৰ্গিত কৰাৰ দাবী উত্থাপন কৰে।

ড০ ভূপেন হাজৰিকাৰ সৃষ্টিৰাজিক বিশ্বদৰবাৰলৈ নিয়াৰ বাবে চৰকাৰে  উচিত পদক্ষেপ লোৱা নাই বুলি ক্ষোভ প্ৰকাশ কৰে আছুৰ সভাপতি আৰু সম্পাদক ক্ৰমে দীপাংক কুমাৰ নাথ আৰু লুৰীন জ্যোতি গগৈয়েও।

তেওঁলোকে লগতে কয় যে সুধাকণ্ঠৰ সৃষ্টিক অসমত এক উচিত মৰ্যাদাৰে সকলোৰে মাজলৈ লৈ যোৱাৰ বাবে আছুৱে সঠিক পদক্ষেপ গ্ৰহণ কৰি থাকিব।

আজি সন্ধিয়া আছুৰ উদ্যোগত দীঘলীপুখুৰীপাৰত অনুষ্ঠিত উদ্দীপনা শীৰ্ষক অনুষ্ঠানত অসমৰ প্ৰতিখন জিলাৰ মহাবিদ্যালয় পৰ্যায়ৰ শ্ৰেষ্ঠ সংগীত শিল্পীয়ে গীত পৰিবেশন কৰিব বুলি দীপাংক কুমাৰ নাথে জানিবলৈ দিয়ে।