ডিব্ৰুগড়ৰ চাউখোৱাৰ গৰুৰ কুখ্যাত চোৰাং কাৰবাৰী মিণ্টু আলীক গ্ৰেপ্তাৰ

ডিব্ৰুগড়ৰ চাউলখোৱাৰ কুখ্যাত গৰু চোৰ মিণ্টু আলীক আৰক্ষীয়ে গ্ৰেপ্তাৰ কৰিছে। ডিব্ৰুগড় আৰক্ষীয়ে শনিবাৰে তিনিচুকীয়াৰ ন পুখুৰী ৰোডৰ পৰা মিন্টু আলীক গ্ৰেপ্তাৰ কৰে। কুখ্যাত গৰু চোৰ মিণ্টু আলী, চিণ্টু আলী, ৰৌচন আলী আৰু চনু আলীয়ে শুকুৰবাৰে দিন দুপৰতে চেলিম আলী নামৰ এজন লোকক দাৰে ঘপিয়াই হত্যা কৰিছিল।

উক্ত ঘটনাৰ পিছতে পলাতক হৈ থকা মিন্টু আলীক আৰক্ষীয়ে গ্ৰেপ্তাৰ কৰিবলৈ সমৰ্থ হ’ল যদিও ঘটনাৰ সৈতে জড়িত চিণ্টু আলী আৰু চনু আলী বৰ্তমানেও পলাতক হৈ আছে।

উল্লেখযোগ্য যে ডিব্ৰুগড়ৰ চাউখোৱাত গৰুৰ কুখ্যাত চোৰাং কাৰবাৰী মিণ্টু আলীয়ে চেলিম আলী (৫০) নামৰ লোকজনক শুকুৰবাৰে হত্যা কৰাৰ বাতৰি প্ৰকাশ পাইছিল। স্থানীয় লোকে জনোৱা মতে অভিযুক্ত মিণ্টুৱে চেলিম আলীক ডিঙি কাটি হত্যা কৰি ঘটনাস্থলীৰ পৰা পলায়ন কৰিছিল।

গুৰুতৰভাৱে আহত চেলিম আলীক স্থানীয় লোকসকলে ততাতয়াকৈ চিকিৎসালয়লৈ লৈ যায় যদিও চিকিৎসকে তেওঁক বাটতেই মৃত্যু হোৱা বুলি ঘোষণা কৰে।

উল্লেখ্য যে গৰুৰ কুখ্যাত চোৰাং কাৰবাৰী মিণ্টু আলীক বহুবাৰ গৰুভৰ্তি ট্ৰাকসহ ধৰা পেলায়ো উপযুক্ত তথ্যৰ অভাৱত আৰক্ষীয়ে গ্ৰেপ্তাৰ কৰিব পৰা নাছিল।

স্থানীয় লোকৰ অভিযোগ যে আৰক্ষীয়ে সকলে জানিও চকুমুদা কুলিৰ ভূমিকা পালন কৰি আহিছে। মিণ্টু আলীয়ে স্থানীয় যুৱকসকলক তেওঁৰ দলত যোগদান কৰাৰ বাবে ভাবুকি দি আহিছিল বুলিও স্থানীয় ৰাইজে প্ৰকাশ কৰিছে।

আন এক সূত্ৰই জানিব দিয়া মতে, ‘‘মিণ্টু আলীয়ে বহু বছৰ ধৰি গৰুৰ চোৰাং কাৰবাৰ কৰি আহিছে। উজনি অসমৰ গৰু চোৰৰ সৈতে মিন্টু আলীৰ এটা যোগসূত্ৰ আছে। আলীয়ে কচাইখানাত চোৰাংগৰু বিক্ৰী কৰে আৰু নিশা গৰাকী নোহোৱা গৰুবোৰ বাটৰ পৰা তুলি লৈ যায়।’’

চেলিম আলীক হত্যা কৰাৰ পিছত স্থানীয় লোকসকলে প্ৰায় এঘণ্টা ধৰি লাহোৱাল থানা ঘেৰাও কৰি দোষীক অনতিপলমে গ্ৰেপ্তাৰ কৰাৰ দাবী জনাইছিল।