বি পি এফৰ কাৰ্বন বিৰোধী ধৰ্ণাই অস্থিৰ কৰিছে প্ৰশাসনক; ১৪৪ ধাৰা জাৰি

চিৰাং জিলাৰ বি পি এফ দলৰ নেতা-কৰ্মচাৰীয়ে যোৱা সাত দিন ধৰি অব্যাহত ৰখা কাৰ্বন বিৰোধী ধৰ্ণা কাৰ্যসূচীয়ে এক অস্থিৰ পৰিৱেশৰ সৃষ্টি কৰিছে জিলাখনৰ কুকুৰমাৰী অঞ্চলত।

উল্লেখ্য যে জিলাখনৰ ঢালিগাঁও আৰক্ষী থানাৰ অন্তৰ্গত কুকুৰমাৰীত থকা কাৰ্বন ৰিচ’ৰ্ছেছ প্ৰাইভেট লিমিটেডৰ মুখ্য প্ৰৱেশদ্বাৰত কোম্পানীটো বন্ধ কৰাৰ দাবীত বি পি এফৰ কৰ্মকৰ্তাসকলে এই ধৰ্ণা কাৰ্যসূচী ৰূপায়ণ কৰি আছে।

উল্লেখ্য যে ধৰ্ণা কাৰ্যসূচীৰ বাবে কোম্পানীটোৰ পৰা কোনো গাড়ী ওলোৱা সোমোৱা কৰিব নোৱাৰাত এক অচলাৱস্থাৰ সৃষ্টি হোৱা পৰিলক্ষিত হয়। পাছত বুধবাৰে ঘটনাস্থলত উপস্থিত হোৱা প্ৰশাসনৰ লোকে প্ৰতিবাদকাৰীসকলৰ সৈতে ধৰ্ণা বাতিল কৰা সন্দৰ্ভত তীব্ৰ বাক-বিতণ্ডাত লিপ্ত হোৱা দেখা যায়।

ইয়াৰ পাছতে জিলা দণ্ডাধীশ ৰাতুল বৰুৱাই এক নিৰ্দেশনাযোগে ১০ অক্টোবৰৰ পৰা কাৰ্যকৰী হোৱাকৈ কাৰ্বন ৰিচ’ৰ্ছেছ প্ৰাইভেট লিমিটেডৰ চাৰিওদিশে দুশ মিটাৰত ১৪৪ ধাৰা জাৰি কৰি উক্ত অঞ্চলটোত ধৰ্ণা, প্ৰতিবাদ আদি কাৰ্যসূচী নিষিদ্ধ কৰে।

উল্লেখ্য যে ৪ অক্টোবৰৰ পৰা চলা এই ধৰ্ণা কাৰ্যসূচী প্ৰথমে ৪৮ ঘণ্টীয়া আছিল যদিও পৰৱৰ্তী সময়ত প্ৰশাসনে কোম্পানীটোৰ বিৰুদ্ধে একো ব্যৱস্থা গ্ৰহণ নকৰাত বি পি এফ কৰ্মী সকলে এই ধৰ্ণা কাৰ্যসূচী অনিৰ্দিষ্ট কাললৈ কৰি যোৱাৰ সিদ্ধান্ত গ্ৰহণ কৰে।