বিশ্বনাথ চাৰিআলিত দুৰ্গা পূজা উপলক্ষে আধ্যাত্মিক মেলা আৰম্ভ

প্ৰজাপিতা ব্ৰহ্মাকুমাৰী ঈশ্বৰীয় বিশ্ববিদ্যালয়ৰ বিশ্বনাথ চাৰিআলি শাখাৰ উদ্যোগত দূৰ্গা পূজা উপলক্ষে ১৪ অক্টোবৰৰ পৰা বিশ্বনাথ চাৰিআলিৰ লক্ষীধৰ ক্ষেত্ৰত পাঁচদিনীয়া কাৰ্য্যসূচীৰে এক সাৰ্বজনীন আধ্যাত্মিক মেলাৰ আয়োজন কৰিছে।

এই উপলক্ষে কালি বিশ্বনাথৰ বিধায়ক প্ৰমোদ বৰঠাকুৰৰ লগতে বিশ্বনাথ জিলাৰ উপায়ুক্ত ধীৰাজ জ্যোতি কলিতাই মেলাৰ প্ৰৱেশদ্বাৰ মুকলি কৰে।

উক্ত অনুষ্ঠানটি পৰিচালনা কৰিব প্ৰতিষ্ঠানটিৰ পৰিচালিকা বি কে সবিতাই। এই আধ্যাত্মিক মেলাৰ বিশেষ আকৰ্ষণ হিচাপে গুহাৰ মাজত ১২ বিশ্ববিখ্যাত জ্যোতিৰ্লিংগমৰ প্ৰতিষ্ঠা আৰু প্ৰদৰ্শনৰ ব্যৱস্থা তথা আধ্যাত্মিক ৰহস্যৰ বিশ্লেষণৰ লগতে অত্যাধুনিক পোহৰ আৰু শব্দৰ মাধ্যমেৰে চৈতন্য নৱদূৰ্গা প্ৰদৰ্শন আৰু আধ্যাত্মিক বিশ্লেষণ কৰা হৈছে।

ইয়াৰ উপৰিও বিনামূলীয়া স্বাস্থ্য শিবিৰ, আধ্যাত্মিক চিত্ৰ প্ৰদৰ্শনী আৰু ৰাজযোগ শিবিৰৰ ব্যৱস্থা কৰিছে বুলি প্ৰতিষ্ঠানটোৰ কৰ্তৃপক্ষই জানিবলৈ দিয়ে।

সমাজত সকলোৰে মাজত শান্তি-সম্প্ৰীতি অটুত ৰখা আৰু বিশ্ব ভাতৃত্বৰ ভাব জগাই তোলাই এই মেলাৰ উদ্দেশ্য আৰু মুখ্য শ্ল’গান হৈছে “আমি সকলো এক ভগৱান, আল্লা, ঈশ্বৰৰ সন্তান, এজনেই আমাৰ পিতা’ বুলি সদৰী কৰে পৰিচালিকাগৰাকীয়ে।

এই মেলাৰ মুখ্য অতিথি হিচাপে ব্ৰহ্মাকুমাৰী বিশ্ববিদ্যালয়ৰ উত্তৰ পূৰ্বাঞ্চলৰ সঞ্চালিকা ৰাজযোগিনী শিলা, নলবাৰী আৰু বৰপেটা জিলাৰ তত্বাৱধায়ক ৰাজযোগিনী জোনালী উদ্বোধনী অনুষ্ঠানটোত উপস্থিত থাকে।