গুৱাহাটীৰ পৰা চুৰি কৰি অনা ৰয়েল এণ্ডফিল্ড বাইক বোকাখাতত এৰি পলাল চোৰ

গুৱাহাটী জয়ানগৰৰ পৰা নিশা চুৰি কৰি অনা এখন ৰয়েল এণ্ডফিল্ড থাণ্ডাৰবাৰ্ড ৩৫০ মটৰ চাইকেল আজি পুৱা বোকাখাতত নাটকীয় ভাৱে উদ্ধাৰ হয়।

গুৱাহাটীৰ জয়া নগৰৰ পৰা যোৱা নিশা এ এছ – ০১ ডি এন- ০৯২৬ নম্বৰৰ এণ্ডফিল্ড থান্ডাৰবাৰ্ড মটৰ চাইকেলখন চুৰি হোৱাৰ পিছতে মটৰ চাইকেলৰ মালিক চৈয়দ জিন্না জাহিদে বশিষ্ঠ থানাত লিখিত অভিযোগ দিয়াৰ পিছত নিজেই মটৰ চাইকেলৰ সন্ধানত লাগি যায়।

আৰু নিশা জি পি এছ কৌশলৰ সহায়ত তেওঁ মটৰ চাইকেলখন কাজিৰঙাৰ বাগৰিৰ এখন লাইন হোটেলৰ সমীপত আৱিস্কাৰ কৰে। ইয়াৰ পিছতে জিন্না জাহিদে বোকাখাতত থকা তেওঁৰ বন্ধুবৰ্গক কথাটো অৱগত কৰি বোকাখাতৰ আৰক্ষীৰ সহযোগত অভিযান আৰম্ভ কৰে।

মটৰচাইকেলখন এজন যুৱকে চলাই অনা প্ৰত্যক্ষ কৰি আৰক্ষীৰ দলে অনুসৰণ কৰাত উক্ত যুৱকজনে মটৰ চাইকেল লৈ ৩৭ নং ৰাষ্ট্ৰীয় পথ এৰি দক্ষিণলৈ পলায়ন কৰে যদিও পাছে পাছে আৰক্ষীয়ে খেদি যোৱাত যুৱকজনে মটৰচাইকেলখন এৰি থৈ তাৰ পৰা পলায়ন কৰে।

আৰক্ষীয়ে মটৰচাইকেলখনৰ সৈতে এটা বেগো উদ্ধাৰ কৰে যদিও বাতৰি লিখা পৰলৈকে চোৰক কৰায়ত্ত কৰিব পৰা নাই। আনহাতে, বেগটোৰ পৰা আৰক্ষীয়ে চোৰে ব্যৱহাৰ কৰা এটা মোবাইল ফোন উদ্ধাৰ কৰিছে বুলি জানিবলৈ দিয়ে। সম্প্ৰতি চোৰক বিচাৰি বোকাখাত আৰক্ষীয়ে অভিযান চলাই আছে।