দেশৰ দীৰ্ঘতম দলং হোৱাৰ পথত ব্ৰহ্মপুত্ৰৰ ওপৰত নিৰ্মাণ হ’বলগীয়া ধুবুৰী-ফুলবাৰী দলং

দেশৰ দীৰ্ঘতম নদীৰ ওপৰত নিৰ্মিত দলঙৰ নতুন অভিলেখ গঢ়াৰ পথত আগবাঢ়িছে অসমৰ ধুবুৰীত ব্ৰহ্মপুত্ৰৰ ওপৰত নিৰ্মাণ হ’বলগীয়া ধুবুৰী-ফুলবাৰী প্ৰস্তাৱিত দলঙে। বৰ্তমান দেশৰ বিতৰতে দীৰ্ঘতম দলং হিচাপে পৰিচিত ধলা-শদিয়াৰ ভূপেন হাজৰিকা সেতুৰ অভিলেখ ই ভংগ কৰিব।

ধলা-শদিয়াৰ দৈৰ্ঘ ৯.১৫ কিলোমিটাৰ হোৱাৰ বিপৰীতে প্ৰস্তাৱিত ধুবুৰী-ফুলবাৰী দলংখনৰ দৈৰ্ঘ হ’ব ২০ কিলোমিটাৰ। দলংখনৰ নদী অংশত থাকিব ১২.৬ কিল’মিটাৰ। দলংখনৰ নিৰ্মাণৰ কাম কোন কোম্পানীক ন্যস্ত কৰা হ’ব সেইটো এতিয়াও চূড়ান্ত হোৱা নাই যদিও ইতিমধ্যে ডি পি আৰ প্ৰস্তুত হোৱা দলংখনৰ নিৰ্মাণ ২০২৬ চনৰ ভিতৰত সম্পূৰ্ণ হৈ উঠাৰ আশা কৰা হৈছে।

প্ৰস্তাৱিত ধুবুৰী-ফুলবাৰী দলঙৰ নিৰ্মাণকাৰ্য ৪ হেজাৰ কোটি টকা ধাৰ্য কৰা হৈছে যদিও এন এইচ আই ডি চি এল কৰ্তৃপক্ষই এই ব্যয় বৃদ্ধি পোৱাৰ কথা ব্যক্ত কৰিছে।

বৰ্তমান গংগাৰ ওপৰত নিৰ্মাণ হৈ থকা ১২.৫০ কিলোমিটাৰ দৈৰ্ঘৰ এখন দলঙে ধলা-শদিয়াৰ অভিলেখ ভংগ কৰিব যদিও ধুবুৰী-ফুলবাৰী দলং সম্পূৰ্ণ হোৱাৰ পাছত পুনৰ অসমতেই দেশৰ দীৰ্ঘতম দলংখনৰ অভিলেখ প্ৰতিষ্ঠা হ’ব।

উল্লেখযোগ্য যে ধুবুৰী আৰু বাংলাদেশ সীমান্তৱৰ্তী ফুলবাৰীৰ মাজত ব্ৰহ্মপুত্ৰৰ ওপৰত নিৰ্মাণ হ’বলগীয়া প্ৰস্তাৱিত দলংখনে অসম, মেঘালয়ৰ লগতে বাংলাদেশকো উপকৃত কৰিব। তদুপৰি, দলংখন নিৰ্মাণ হৈ উঠিলে ২০৩ কিল’মিটাৰ নদী পথ ২০ কিল’মিটাৰলৈ হ্ৰাস পাব।