প্ৰতিজন অসমীয়াই বিজেপিক উচিত প্ৰত্যুত্তৰ দিব লাগিব পঞ্চায়ত নিৰ্বাচনত : ধৈয্য কোঁৱৰ

নাগৰিকত্ব সংশোধনী বিধেয়কৰ বিৰোধিতাৰে অখিল গগৈৰ নেতৃত্বত ৬০টা জাতীয় সংগঠনে দেওবাৰে শদিয়াৰ পৰা আৰম্ভ কৰা সংকল্প যাত্ৰা আজি শিৱসাগৰত আহি উপস্থিত হয়।

সংকল্প যাত্ৰা শিৱসাগৰত উপস্থিত হোৱাৰ পাছতে নগৰৰ দ’লমুখ চাৰি আলিত ৬০ টা জাতীয় সংগঠনৰ কেইবাশ প্ৰতিনিধিৰ উপস্থতিত এখন প্ৰতিবাদী সভা অনুষ্ঠিত হয়।

এই প্ৰতিবাদী সভাত কৃষক মুক্তি সংগ্ৰাম সমিতিৰ সম্পাদক ধৈয্য কোঁৱৰে বিজেপি চৰকাৰখনক তীব্ৰ ভাষাৰে গৰিহণা দিয়ে। তেওঁ কয়, ‘নাগৰিকত্ব সংশোধনী বিধেয়ক বাতিল নোহোৱালৈকে প্ৰতিজন অসমীয়াই ঐক্যবদ্ধভাৱে সংগ্ৰাম কৰি যাব। সাম্প্ৰদায়িক বিজেপি চৰকাৰে অসমীয়া জাতিক ধ্বংস কৰি হিন্দু বাংলাদেশীক স্বদেশী সজাই অসমক হিন্দু ৰাষ্ট্ৰ কৰাৰ ষড়যন্ত্ৰত ব্ৰতী হৈছে’।

‘অসমীয়াৰ গাত শেষ বিন্দু তেজ থকালৈকে আমি সংগ্ৰাম চলাই যাম। সেয়ে এনেধৰণৰ জাতিদ্ৰোহী চৰকাৰক প্ৰতিজন অসম প্ৰেমী ৰাইজে উপযুক্ত প্ৰত্যুত্তৰ দিব লাগিব’। এইদৰে উল্লেখ কৰে কৃষক নেতা ধৈয্য কোঁৱৰে।

এই প্ৰতিবাদী সভাত আটাছুৰ কেন্দ্ৰীয় সভাপতি লিটুল বুঢ়াগোহাঁই, কাৰ্য্যকৰী সভাপতি লোহিত গগৈ, আহোম জাতীয় গণমঞ্চৰ সভাপতি মহেন্দ্ৰ দিহিঙ্গীয়া, উজনি অসম মুছলিম কল্যান পৰিষদৰ কেন্দ্ৰীয় কাৰ্য্যকৰী সভাপতি মনিৰুল ইছলাম বড়া, পি চি পি ডি ৰ অৰ্জুন গোৱালা, দিগন্ত কোঁৱৰ, আহোম সেনাৰ সভাপতি অংকুৰণ ফুকন, টাইপাৰ জিলা সভাপতি দিগন্ত তামুলীয়ে জাতিদ্ৰোহী বিজেপি চৰকাৰক ক্ষুৰধাৰ সমালোচনা কৰে।