মণিপুৰ চৰকাৰে ইতিহাস সৃষ্টিকাৰী বক্সাৰ ‘মেৰী কম’ক প্ৰদান কৰিব ৰাজ্যৰ ‘সৰ্বোচ্চ সন্মান’

যোৱা ২৪ নৱেম্বৰত নতুন দিল্লীত সামৰণি পৰা বিশ্ব মহিলা বক্সিং চেম্পিয়নশ্বিপত ইতিহাস সৃষ্টিৰে ষষ্ঠবাৰলৈ বিশ্ব চেম্পিয়ন হোৱা মহিলা বক্সাৰ মেৰী কমক আদৰিবলৈ সাজু হৈ আছে মণিপুৰ। দেশবাসীক গৰ্বিত কৰা মণিপুৰৰ বৰ্ষীয়ান মহিলা বক্সাৰগৰাকীৰ সাফল্যত উৎফুল্লিত হৈ পৰা মণিপুৰ চৰকাৰে মেৰী কমক প্ৰদান কৰিব ৰাজ্যৰ ‘সৰ্বোচ্চ সন্মান’ ।

দেওবাৰে মণিপুৰৰ ৰাজধানী ইম্ফলত মুখ্য মন্ত্ৰী এন বীৰেন সিঙে এক ঘোষণাৰ জৰিয়তে এই কথা জানিবলৈ দিয়ে। তেওঁ কয়, ‘মণিপুৰৰ বক্সাৰগৰাকীৰ সাফল্যত সমগ্ৰ দেশবাসী গৰ্বিত। ৰাজ্য চৰকাৰে এইগৰাকী জনপ্ৰিয় তথা বিশ্ব চেম্পিয়ন বক্সাৰক ৰাজ্যৰ সৰ্বোচ্চ সন্মান প্ৰদান কৰিবলৈ সাজু হৈ আছে’।

‘বক্সাৰগৰাকীক কেনেধৰণৰ সন্মান প্ৰদান কৰা হ’ব সেই সম্পৰ্কত অতি শীঘ্ৰে কেবিনেটে সিদ্ধান্ত ল’ব’। এইদৰে কয় বীৰেন সিঙে।

তেওঁ লগতে কয়, ‘হয়তো তেওঁক ‘কুইন অব মণিপুৰ’ নাইবা ‘মাডাৰ অব মণিপুৰ’ হিচাবে আখ্যায়িত কৰিব পাৰে। বক্সাৰগৰাকী স্বভূমিত উপস্থিত হোৱাকে আমি অপেক্ষা কৰি আছো। গৃহভূমিত উপস্থিত হোৱাৰ লগে লগে আমি তেওঁক স-সন্মানেৰে আদৰণি জনাম’।

উল্লেখ্য যে বিশ্ব খিতাপ দখল কৰাৰ পাছতে মেৰী কমে নিজৰ মনৰ কথা প্ৰকাশ কৰি কয় যে এতিয়া মোৰ লক্ষ্য ২০২০ত অনুষ্ঠিত হ’বলগীয়া টকিঅ’ অলিম্পিকত সোণৰ পদক অৰ্জন কৰা।

ইফালে ৩৫ বছৰীয়া মেৰী কমক ৰাজ্য চৰকাৰে কিমান পৰিমাণৰ আৰ্থিক পুৰস্কাৰ প্ৰদান কৰিব সেই সম্পৰ্কেও কেবিনেটে সিদ্ধান্ত গ্ৰহণ কৰিব বুলি এক সূত্ৰৰ পৰা জানিব পৰা গৈছে।