বিজেপিৰ শাসনত প্ৰতিবন্ধীৰ দিনো পৰিণত “প্ৰতাৰণা”ৰ দিৱসত

পৰিৱৰ্তনৰ প্ৰতিশ্ৰুতি দিয়া বিজেপি চৰকাৰৰ “প্ৰতাৰণা”ৰ প্ৰতিবাদত প্ৰতিবন্ধীৰ বিশেষ দিনটোকে ‘‘প্ৰতাৰণা দিৱস’’ৰূপে পতাৰ সিদ্ধান্ত লৈছে অসমৰ প্ৰতিবন্ধীসকলে।

অসম চৰকাৰে অহা ৩ ডিচেম্বৰত কেন্দ্ৰীয়ভাৱে আয়োজন কৰা ‘‘প্ৰতিবন্ধী দিৱস’’ বৰ্জন কৰিব অসমৰ প্ৰতিবন্ধীসকলৰ একমাত্ৰ ৰাজ্যিক সংগঠন প্ৰতিবন্ধী সুৰক্ষা সংস্থাই। চৰকাৰী আয়োজনলৈ নগৈ দীঘলীপুখুৰীৰ পাৰত মুখত ক’লা কাপোৰ বান্ধি মৌন প্ৰতিবাদ কৰিব প্ৰতিবন্ধীসকলে।

সংস্থাটোৰ সাধাৰণ সম্পাদক নৃপেন মালাকাৰে নৰ্থ ইষ্ট নাও-ক জনোৱা মতে দৃষ্টিহীন পৰিষদ অসম, সদৌ অসম দৃষ্টিহীন ছাত্ৰ সন্থা, পূবালী প্ৰতিবন্ধী সংস্থা, সদৌ বড়োলেণ্ড প্ৰতিবন্ধী সুৰক্ষা সংস্থাকে ধৰি প্ৰতিবন্ধীসকলৰ আন সংগঠনসমূহেও তেওঁলোকৰ এই সিদ্ধান্তত সমৰ্থন জনাইছে।

প্ৰতিবন্ধীসকলে তেওঁলোকৰ দাবীসমূহ সমাধানৰ বাবে আজি ১ ডিচেম্বৰলৈকে সময় দিছিল অসম চৰকাৰক। কিন্তু বিজেপি নেতৃত্বাধীন চৰকাৰখনে সমাধান বাদ, বিবেচনাই নকৰিলে তেওঁলোকৰ দাবী।

“আমি আমাৰ দীৰ্ঘদিনীয়া দাবীসমূহ পূৰণ কৰিবৰ বাবে ১ ডিচেম্বৰলৈকে চৰকাৰক সময়সীমা দিছিলো। কিন্তু ধৈৰ্য্যৰ বান্ধ চিঙি যোৱা বাবে এই সিদ্ধান্ত ল’বলৈ আমি বাধ্য হ’লো,” নৰ্থ ইষ্ট নাও-ক জনালে মালাকাৰে।

বিজেপি চৰকাৰখনে “মিথ্যাচাৰ”ৰ আশ্ৰয় লোৱাৰ অভিযোগ কৰিছে মালাকাৰে। অসম চৰকাৰে যোৱা বৰ্ষৰ ৭ ফেব্ৰুৱাৰিত ঘোষণা কৰা তথা যোৱা ‘‘প্ৰতিবন্ধী দিৱস’’ত কাৰ্য্যকৰী কৰা ৫ হাজাৰ টকাৰ এককালীন সাহায্যৰ পৰা আজিও বঞ্চিত হৈ আছে প্ৰায় ৩ লাখ প্ৰতিবন্ধী।

“প্ৰথম পৰ্য্যায়ত চৰকাৰে চাৰে চাৰি লাখ প্ৰতিবন্ধীৰ ১ লাখ ৩০ হাজাৰ গৰাকীক নিৰ্বাচিত কৰি লৈ ৫০০০ টকাৰ এককালীন সাহায্য দিয়াৰ কথা আছিল,” মালাকাৰৰ অভিযোগ।

‘‘বাৰম্বাৰ চৰকাৰৰ সমাজ কল্যাণ বিভাগে আলোচনাৰ কালত ৪৪১৯ টা পদত নিযুক্তি দিয়াৰ প্ৰতিশ্ৰুতি দিয়াৰ পাছতেই কেনেকৈ কেৱল ৬৪০ টা পদত নিযুক্তি দিয়াৰ কথা আহি পৰিল? ১০০০ টকাকৈ প্ৰত্যেকগৰাকী প্ৰতিবন্ধীক মাহেকীয়া হিচাপত দিয়াৰ প্ৰতিশ্ৰুতি ক’ত গ’ল?” প্ৰশ্ন মালাকাৰৰ।

হাতত লোৱা প্ৰতিবাদী কাৰ্য্যসূচীৰ পাছতেই মুখ্য মন্ত্ৰী সৰ্বানন্দ সোণোৱালক ৭ দিনৰ সময়সীমা দিব বুলি জানিবলৈ দিয়ে সংস্থাৰ সাধাৰণ সম্পাদকগৰাকীয়ে। ভৱিষ্যতে ধাৰাবহিকভাৱে আইন শৃংখলাজনিত পৰিস্থিতিৰ সৃষ্টি কৰিব পৰা আন্দোলন কৰিব বুলিও হুংকাৰ দিয়ে তেওঁ।

এই চৰকাৰৰ দিনতে যোৱা ৫ অক্টোবৰত দিচপুৰত প্ৰতিবাদ কৰিবলৈ আহি আৰক্ষীৰ বৰ্বৰ আক্ৰমণৰ বলি হৈছিল প্ৰতিবন্ধীসকল। তেওঁলোকৰ দাবী সত্ত্বেও উক্ত বৰ্বৰ আক্ৰমণৰ কোনোধৰণৰ তদন্ত নকৰিলে সোণোৱাল চৰকাৰে।