পঞ্চায়ত নিৰ্বাচনৰ প্ৰাক মুহূৰ্তত ৭০টা সংগঠনত ‘বিভাজন’: কালৈ আঙুলি পলাশ চাংমাইৰ?

পঞ্চায়ত নিৰ্বাচনৰ প্ৰাক মুহূৰ্তত বিজেপি চৰকাৰ উত্থাপিত নাগৰিকত্ব বিধেয়কৰ বিৰুদ্ধে গণ সংগ্ৰামৰ নেতৃত্বদায়ী ৭০টা সংগঠনত “বিভাজন” হোৱা বুলি প্ৰচাৰিত বাতৰি ভুৱা আৰু এই অপপ্ৰচাৰৰ আঁৰত আছে “চৰকাৰ”।

৭০টা সংগঠনৰ ১৪টাই সমৰ্থন প্ৰত্যাহাৰ কৰা বুলি দুৰ্নীতি বিৰোধী যুৱ শক্তি নামৰ এটা সংগঠনৰ নেতা ধৰ্মকান্ত গগৈৰ উদ্ধৃতিৰে একাংশ সংবাদ মাধ্যমে পৰিৱেশন কৰা “খবৰ” নস্যাৎ কৰি নৰ্থ ইষ্ট নাও-ত মঙলবাৰে এই স্পষ্টীকৰণ দিছে অসম জাতীয়তাবাদী যুৱ ছাত্ৰ পৰিষদৰ সাধাৰণ সম্পাদক পলাশ চাংমায়ে।

“এইবোৰ  চৰকাৰী পক্ষৰ অপপ্ৰচাৰ। যিজন লোকে এই অপপ্ৰচাৰটো চলাইছে তেওঁ টাই আহোম যুৱ পৰিষদৰ পৰা বহিষ্কৃত সদস্য। তাৰ পৰা ওলাই তেওঁ এটা সংগঠন খুলি লৈছিল। আৰু সেই সংগঠনটো ৭০ টা সংগঠনৰ উমৈহতীয়া মঞ্চত নাছিল,” জনালে চাংমায়ে।

ধৰ্মকান্ত গগৈক আৰ এছ এছ-বিজেপি নিয়োজিত “দালাল” বুলি অভিহিত কৰি উমৈহতীয়া মঞ্চৰ নেতৃত্বৰ দাবী যে গগৈৰ দুৰ্নীতি বিৰোধী যুৱ শক্তি বোলা সংগঠনটো উমৈহতীয়া মঞ্চৰ অন্তৰ্ভুক্তই নাছিল কোনোদিন!

গগৈয়ে উল্লেখ কৰা ১৪টা সংগঠনৰ ১২টা ৭০ সংগঠনৰ অন্তৰ্ভুক্তই নহয় আৰু বাকী দুয়োটাই সমৰ্থন প্ৰত্যাহাৰ কৰাই নাই, দাবী নেতৃত্বৰ।

‘‘অনুসূচিত জাতি যুৱ ছাত্ৰ সন্থা আৰু সদৌ অসম গৰিয়া মৰিয়া যুৱ ছাত্ৰ পৰিষদে সমৰ্থন প্ৰত্যাহাৰ কৰিছে বুলি ক’বলৈ (ধৰ্মকান্ত গগৈয়ে) ক’ত কৰ্তৃত্ব পালে। তেওঁ এই ভুৱা বাতৰি বিয়পাই নাগৰিকত্ব সংশোধনী বিধেয়কৰ বিৰুদ্ধে আন্দোলন কৰি থকা সংগঠনসমূহৰ ঐক্য বিনষ্ট কৰা আৰু সংগঠনসমূহক জনমানসত হেয় প্ৰতিপন্ন কৰাৰ অপচেষ্টা কৰিছে,” সংবাদ মাধ্যমত এই স্পষ্টীকৰণ সন্থাৰ সভাপতি, সম্পাদক ক্ৰমে নিপেন দাস আৰু নিত্যানন্দ দাস আৰু পৰিষদৰ সভাপতি, সম্পাদক ক্ৰমে আশ্ৰফ আলী আৰু মইনুল হকৰ।