আজিৰ পৰা কেইবাদিনো ধৰি অচল হ’ব বেংক সেৱা; এ টি এম খালী হোৱাৰো সম্ভাৱনা

আজিৰ পৰা ২৬ ডিচেম্বৰলৈ অৰ্থাৎ ৫ দিনৰ বাবে বন্ধ থাকিব চৰকাৰী খণ্ডৰ বেংক সেৱা। যাৰ বাবে দেশৰ অন্য প্ৰান্তৰ লগতে অসম তথা উত্তৰ-পূবৰ গ্ৰাহক সকল যথেষ্ট অসুবিধাৰ সন্মুখীন হোৱাৰ সম্ভাৱনা আছে।

উল্লেখযোগ্য যে দৰমহা বৃদ্ধি আৰু ৰাজহুৱা খণ্ডৰ বেংকৰ চামিলকৰণৰ প্ৰতিবাদ জনাই আজি আৰু অহা ২৬ ডিচেম্বৰত দেশজুৰি অল ইণ্ডিয়া বেংক অফিচাৰ্ছ কনফেডাৰেশ্যনে (এ আই বি অ’ চি)  আৰু য়ুনাইটেড ফ’ৰাম অব বেংক য়ুনিয়নছ (য়ু এফ বি য়ু)এ ধৰ্মঘটৰ কাৰ্যসূচী ঘোষণা কৰিছে।

এই দিন দুটাৰ উপৰি আন বন্ধৰ ফলত আজিৰ পৰা কেইবাদিনৰ বাবে বেংকসমূহ বন্ধ হৈ পৰিব। উল্লেখ্য যে আজি আৰু ২৬ ডিচেম্বৰত আহ্বান জনোৱা ধৰ্মঘটৰ উপৰি ২২ ডিচেম্বৰ মাহৰ চতুৰ্থ শনিবাৰ, ২৩ ডিচেম্বৰ দেওবাৰ আৰু ২৫ ডিচেম্বৰ বৰদিন উপলক্ষে বেংক সেৱা বন্ধ থাকিব।

এইখিনিতে উল্লেখ কৰি থোৱা ভাল হ’ব যে আজিৰ পৰা ২৬ ডিচেম্বৰৰ ভিতৰত মাজত কেৱল ২৪ ডিচেম্বৰৰ দিনটোহে বেংকসমূহ খোলা থাকিব। তদুপৰি আজি আহ্বান জনোৱা ধৰ্মঘটৰ বাবে এ টি এম সেৱাত কোনো ধৰণৰ প্ৰভাৱ নেপালাই বুলি কোৱাৰ বিপৰীতে ২৬ ডিচেম্বৰৰ ধৰ্মঘটে এ টি এম সেৱাত প্ৰভাৱ পেলাব বুলি উল্লেখ কৰে।