বিশ্বনাথৰ কৃষি বিভাগত বীজ যোগানৰ নামত বৃহৎ কেলেংকাৰি

বিশ্বনাথত কৃষি মন্ত্ৰী অতুল বৰাৰ বিভাগত বীজ যোগানৰ নামত বৃহৎ কেলেংকাৰি হোৱা ঘটনা পোহৰলৈ আহিছে। কৃষকৰ মূৰত ৰাম টাঙোন সোধাই দায়িত্ব সামৰিলে জিলা কৃষি বিভাগৰ বীজ যোগান বিষয়াই। মন্ত্ৰী অতুল বৰাৰ কৃষি বিভাগৰ বীজ ব্যবহাৰ কৰি বিশ্বনাথৰ একাংশ কৃষকে মূৰে কপালে হাত দিবলগীয়া অবস্থাৰ সৃষ্টি হৈছে।

বিশ্বনাথৰ পানীভৰাল গাঁৱৰ একাংশ খেতিয়কে কৃষি বিভাগে যোগান ধৰা বীজৰে খেতি কৰিছিল। কৃষি বিভাগে যোগান ধৰা ব্ৰকলিৰ বীজৰে এই পথাৰখনত দৰিদ্ৰ কৃষকসকলে খেতি কৰিছিল। কিন্তু কৃষকৰ খেতি পথাৰত ব্ৰকলিৰ পৰিবৰ্তে লাগিল হালধীয়া সৰিহৰ সদৃশ ফুলহে। কেৱল ব্ৰকলিৰ ক্ষেত্ৰতে নহয়, কৃষি বিভাগে যোগান ধৰা বন্ধাকবি, আৰু বিলাহী খেতিটো একে পৰিবেশ।

যি সময়ত বজাৰত কবি আৰু বিলাহীৰ উভৈনদী হোৱাৰ সময়তো এই পৰ্যন্ত এইসকল কৃষকৰ খেতি পথাৰত লগা নাই এটাও বিলাহী অথবা কবি। চৰকাৰৰ কৃষি বিভাগে যোগান ধৰা বীজে মাধমাৰ সোধাইছে এইসকল কৃষকৰ মূৰত।

এতিয়া নিৰুপায় হ’ল বিশ্বনাথৰ এই সকল খেতিয়ক। কাৰণ বহু কষ্ট কৰি খেতিয়কসকলে বেংকৰ ঋণ লৈ কৃষি কৰ্ম কৰিছিল। খেতি ভাল হলে সপোন ৰচিছিল বেংকৰ ঋণ পৰিশোধ কৰাৰ লগতে  দূৰ কৰিব নিজ পৰিয়ালৰ দুখ-দুৰ্দশা। কিন্তু মন্ত্ৰী অতুল বৰাৰ কৃষি বিভাগে এই খেতিয়ক সকলৰ জীবনলৈ কঢ়িয়াই আনিলে ঘোৰ আমানিশা।

খেতিয়কসকলে এই সন্দৰ্ভত কৃষি বিষয়াসকলক জানাইছিল যদিও  কৃষি বিভাগৰ বিভাগে ইযাৰ বিৰুদ্ধে কোনো বিকল্প ব্যবস্হা নল’লে। যাৰ বাবে এতিয়া বিশ্বনাথৰ এই কৃষকসকলৰ পানীত হাঁহ নচৰা অবস্থাৰ সৃষ্টি হৈছে।

দুখীয়া কৃষকসকলক কৃষি বিভাগে বীজ যোগানৰ নামত এটা বিয়াগোম কেলেংকাৰি সংঘটিত কৰিলে। এতিয়া মন্ত্ৰী অতুল বৰাই কি ব্যবস্থা গ্ৰহণ কৰিব, সেয়াহে লক্ষণীয় হ’ব।