নাগৰিকত্ব বিধেয়ক বাতিলৰ দাবীত বিশ্বনাথত ই-ৰিক্সা চালক সন্থাৰ প্ৰতিবাদ

আজিও অব্যাহত আছে জাতিধ্বংসী নাগৰিকত্ব সংশোধনী বিধেয়কৰ বিৰুদ্ধে প্ৰতিবাদ। আজি মাঘ মাহৰ পহিলা দিনটোতে বিশ্বনাথৰ ই-ৰিক্সা চালক সন্থাই বিধেয়কখনৰ বিৰুদ্ধে তীব্ৰ প্ৰতিবাদ সাব্যস্ত কৰে।

সদৌ অসম ছাত্ৰ সন্থাকে ধৰি বিশ্বনাথৰ বিভিন্ন জাতীয় দল সংগঠনৰ সহযোগত ই-ৰিক্সা সন্থাই উলিওৱা সমদলত বহুতো প্ৰতিবাদকাৰীয়ে অংশগ্ৰহণ কৰে। প্ৰতিবাদকাৰী সকলে বিশ্বনাথ নগৰৰ পুলিচ পইণ্টৰ ওচৰত একত্ৰিত মুখ্য মন্ত্ৰী সোণোৱালৰ প্ৰতিকৃতি দাহ কৰা পৰিলক্ষিত হয়।

প্ৰতিবাদকাৰী সকলে প্ৰধান মন্ত্ৰী নৰেন্দ্ৰ মোদী মুৰ্দাবাদ, সৰ্বানন্দ সোণোৱাল মুৰ্দাবাদ ইত্যাদি চৰকাৰ বিৰোধী শ্লোগানেৰে উত্তাল কৰি তোলে বিশ্বনাথৰ ৰাজপথ।

আনহাতে নাগৰিকত্ব সংশোধনী বিধেয়কৰ জৰিয়তে হিন্দু বাংলাদেশীক সংস্থাপন দিবলৈ ওলোৱা বিজেপি চৰকাৰক ধিক্কাৰ দিয়াৰ লগতে এনে কাৰ্য কোনোপধ্যেই মানি লোৱা নহ’ব বুলি স্পষ্ট কৰি দিয়ে ই-ৰিক্সা চালক সন্থাই।

উল্লেখ্য যে যোৱা ৮ জানুৱাৰিত নাগৰিকত্ব সংশোধনী বিধেয়কখন লোকসভাত গৃহীত হোৱাৰ পাছৰে পৰা অসমৰ বিভিন্ন জাতীয় দল-সংগঠন, ছাত্ৰ সমাজৰ লগতে আগশাৰীৰ সচেতন নাগৰিকে প্ৰতিবাদ সাব্যস্ত কৰি আছে। কিন্তু ইয়াৰ পাছতো বিজেপি নেতৃত্বাধীন অসম চৰকাৰে এই বিধেয়কখনৰ সপক্ষে যুক্তি যুক্ততা প্ৰদৰ্শন কৰাত ব্যস্ত আছে।