চাহ শ্ৰমিকসকলৰ দৈনিক মজুৰি ৩৫০ টকালৈ বৃদ্ধি কৰাৰ দাবী

চাহ শ্ৰমিকসকলৰ নিম্নতম মজুৰি ৩৫০ টকা কৰাৰ দাবীৰে কালি অসম সংগ্ৰামী চাহ শ্ৰমিক সংঘই (ASCSS) মুখ্য মন্ত্ৰীলি স্মাৰক পত্ৰ প্ৰেৰণ কৰে। সংগঠনটোৰ তিনিচুকীয়া চক্ৰৰ সচিব চৰিফ গোৱালাই এ আই চি চি টি য়ুৰ ৰাজ্যিক সচিব সুভাষ সেনৰ সৈতে তিনিচুকীয়া জিলাৰ উপায়ুক্তৰ কাৰ্য্যালয়ত উপস্থিত হৈ উপায়ুক্তজনৰ জৰিয়তে মুখ্য মন্ত্ৰী সৰ্বানন্দ সোণোৱাললৈ এই স্মাৰকপত্ৰ প্ৰেৰণ কৰে। স্মাৰক পত্ৰখনত মজুৰি বৃদ্ধিৰ লগতে কিছুদিন পূৰ্বে গুলীচালনাৰ ঘটনা সংঘটিত হোৱা গোলাঘাটৰ বগীধলা চাহ বাগিচাখনক চৰকাৰৰ অধীনলৈ আনিবলৈ আৰু সংঘটোৰ নেতা গংগাৰাম ক’লৰ হত্যাকাৰীক শীঘ্ৰে গ্ৰেপ্তাৰ কৰাৰো দাবী কৰে স্মাৰকপত্ৰখনত।

নেতাদ্বয়ে সাংবাদিকৰ আগত কয় যে কংগ্ৰেছ আৰু বিজেপি দুয়োখন চৰকাৰেই চাহ শ্ৰমিকৰ দৰমহা সন্দৰ্ভত একেই নীতি গ্ৰহণ কৰি আহিছে। গতিকে ইয়াৰ অন্তৰালত কিবা বুজাবুজি থকা যেন ভাব হয়।

‘আমি বিজেপি নেতৃত্বাধীন চৰকাৰখনক চাহ শ্ৰমিকসকলৰ দৈনিক মজুৰি ৩৫০ টকালৈ বৃদ্ধি কৰিবলৈ আৰু লগতে বগীধলা চাহ বাগিচা চৰকাৰৰ অধীনলৈ আনিবলৈ দাবী জনাইছো।’ চৰিফ গোৱালাই কয়।