ছয় জনগোষ্ঠীক শীঘ্ৰে জনজাতিকৰণৰ আশ্বাস মুখ্য মন্ত্ৰী সোণোৱালৰ

ছয় জনগোষ্ঠীৰ জনজাতিকৰণ শীঘ্ৰেই কৰাৰ আশ্বাস প্ৰদান কৰিছে মুখ্য মন্ত্ৰী সোণোৱালে। বৃহস্পতিবাৰে ছয় জনগোষ্ঠীৰ প্ৰতিনিধিৰ সৈতে জনজাতিকৰণ সন্দৰ্ভত জনতা ভৱনত অনুষ্ঠিত এখন বৈঠকত মুখ্যমন্ত্ৰী সৰ্বানন্দ সোণোৱালে এই আশ্বাস প্ৰদান কৰে।

মুখ্য মন্ত্ৰী সোণোৱালে কয় যে বৰ্তমানৰ ৰাজ্য চৰকাৰ আৰু কেন্দ্ৰীয় চৰকাৰে বৰ্তমানৰ জনজাতিসকলৰ সা-সুবিধা তথা অধিকাৰ বিঘ্নিত নোহোৱাকৈ ছয় জনগোষ্ঠীৰ জনজাতিকৰণ কৰিব।

বৈঠকত ছয়টা জনগোষ্ঠী মৰাণ, মটক, তাই-আহোম, কোচ-ৰাজবংশী, চুতীয়া আৰু চাহ জনগোষ্ঠীৰ প্ৰতিনিধি উপস্থিত থাকে।

সোমোৱালে জানিবলৈ দিয়ে যে চৰকাৰে এই সন্দৰ্ভত প্ৰস্তাৱ প্ৰস্তুত কৰি বৰ্তমানৰ জনজাতিসকলৰ সা-সুবিধা তথা অধিকাৰ বিঘ্নিত নোহোৱাকৈ ছয় জনগোষ্ঠীৰ জনজাতিকৰণ বিষয়টো সংশ্লিষ্ট সকলোৰে সৈতে আলোচনা কৰাৰ পাছত কেন্দ্ৰৰ ওচৰত দাখিল কৰিব।

তেওঁ লগতে জানিবলৈ দিয়ে যে কেন্দ্ৰীয় চৰকাৰে ভাৰতৰ মহা পঞ্জীয়ক, অনুসূচীত জনজাতিৰ ৰাষ্ট্ৰীয় আয়োগ আৰু কেন্দ্ৰীয় কেবিনেটৰ পৰা সকলো প্ৰয়োজনীয় দিশ সম্পূৰ্ণ কৰাৰ পাছত এখন বিধেয়ক উত্থাপন কৰিছিল।

তেওঁ লগতে কয় যে গোটেই প্ৰক্ৰিয়া চোৱাচিতা কৰাৰ বাবে ৰাজ্যৰ বিত্ত মন্ত্ৰী ড০ হিমন্ত বিশ্ব শৰ্মাক অধ্যক্ষ হিচাপে লৈ এখন মন্ত্ৰী গোট গঠন কৰা হৈছে। সোণোৱালে ভাষা-সাহিত্য-সংস্কৃতিৰ সুৰক্ষাৰ বাবে ছয় জনগোষ্ঠীৰ জনজাতিকৰণ গুৰুত্বপূৰ্ণ বুলিও ব্যক্ত কৰে।

আনহাতে, মন্ত্ৰী গোটৰ আহ্বায়ক চন্দন ব্ৰহ্মই জনায় যে অহা ২৮ জানুৱাৰিৰ পৰা ৩ ফেব্ৰুৱাৰিলৈকে বিষয়টোৰ সন্তোষজনক সিদ্ধান্ত গ্ৰহণৰ বাবে সংশ্লিষ্ট সকলো পক্ষৰ সৈতে আলোচনা কৰা হ’ব।

ইয়াৰ মাজতে মুখ্য মন্ত্ৰী সোণোৱালে ছয় জনগোষ্ঠীৰ প্ৰতিনিধিসকলক এই সন্দৰ্ভত কোনো অপপ্ৰচাৰ তথা ভুৱা তথ্যত গুৰুত্ব নিদিবলৈ আহ্বান জনায়।