ঘগ্ৰাপাৰত আছু সদস্যৰ ওপৰত বিজেপিৰ গুণ্ডাগিৰি প্ৰতিবাদ আছুৰ

কলিয়াবৰৰ প্ৰতিৱেদন ২৭ জানুৱাৰিত নলবাৰীৰ ঘগ্ৰাপাৰত বিজেপিৰ গুণ্ডাগিৰিৰ প্ৰতিবাদত আজি  কলিয়াবৰত আছুয়ে তীব্ৰ প্ৰতিবাদ সাব্যস্ত কৰে। প্ৰতিবাদীসকলে মুখ্যমন্ত্ৰী সৰ্বানন্দ সোণোৱাল আৰু বিজেপিৰ ৰাজ্যিক সভাপতি ৰঞ্জিত দাসৰ প্ৰতিমূৰ্তি দাহ কৰি প্ৰতিবাদ সাব্যস্ত কৰে আছু কৰ্মীয়ে।

কলিয়াবৰৰ কুঁৱৰীটোলত কলিয়াবৰ কেন্দ্ৰীয় ছাত্ৰ সন্থাৰ শতাধিক আছুকৰ্মীয়ে মুখ্যমন্ত্ৰী সৰ্বানন্দ সোণোৱাল আৰু বিজেপিৰ ৰাজ্যিক সভাপতি ৰঞ্জিত দাসৰ প্ৰতিমূৰ্তি দাহ কৰি সৰ্বানন্দ সোণোৱাল মুৰ্দাবাদ , হিমন্ত বিশ্ব শৰ্মা মূর্দাবাদ , ৰঞ্জিত দাস মূর্দাবাদ , অসম চৰকাৰ হায় হায় ,পুলিচ প্রশাসন গ’বেক ধ্বনিৰে কুঁৱৰীটোলৰ ৩৭ নং ৰাষ্ট্ৰীয় ঘাইপথ উত্তাল কৰি তোলে ।

যোৱা কালি নলবাৰীত গণতান্ত্ৰিক ভাবে আছুৱে প্ৰতিবাদী কাৰ্যসূচী ৰূপায়ন কৰি থকা অৱস্থাত বিজেপি সদস্যই অতৰ্কিতে আছু সদস্যক আক্ৰমণ কৰাৰ লগতে আছুৰ পতাকা ভৰিৰে মোহাৰি পেলোৱাৰ কাৰ্য্যক কলিয়াবৰ ছাত্ৰ একতা সভাৰ সদস্যই তীব্ৰ ভাষাৰে গৰিহণা দিয়াৰ লগতে আছু কৰ্মীসকলেমুখ্যমন্ত্ৰী সৰ্বানন্দ সোণোৱাল আৰু বিজেপিৰ ৰাজ্যিক সভাপতি ৰঞ্জিত দাসৰ প্ৰতিমূৰ্তি দাহ কৰি প্ৰতিবাদ সাব্যস্ত কৰে ।

আনহাতে এই প্ৰতিবাদৰ ফলত কুঁৱৰীটোলৰ ৩৭ নং ৰাষ্ট্রীয় ঘাইপথত কিছু সময় যাতায়ত বন্ধ হৈ পৰে। অৱশ্যে কলিয়াবৰ আৰক্ষী চকীৰ ভাৰপ্ৰাপ্ত বিষয়া দীনবন্ধু ভূঞাৰ নেতৃত্বত এটা আৰক্ষী দল প্ৰতিবাদস্থলীত উপস্থিত হৈ পৰিবেশ নিয়ন্ত্ৰণ কৰে।

ইফালে কলিয়াবৰ কেন্দ্ৰীয় ছাত্ৰ সন্থাৰ বিষয় ববীয়াই সাংবাদিকৰে হোৱা কথোপকথনত জনাই যে বিজেপি দলে আছুৰ ওপৰত যিমানেই বৰ্বৰতা আৰু আক্ৰোষ মূলক ভাবে দমন কৰাৰ চেষ্টা নকৰক কিয় আছুয়ে সেই বৰ্বৰতাক কেতিয়াওঁ ভয় নকৰে।আৰু নাগৰিকত্ব বিধেয়ক বাতিল নোহোৱা পৰ্য্যন্ত আছুৰ এই আন্দোলন অব্যাহত থাকিব বুলি মত প্ৰকাশ কৰে।

উত্তৰ লখিমপুৰৰ প্ৰতিৱেদন আজি আছুৰ উত্তৰ লখিমপুৰ গোটেও অসমৰ মুখ্য মন্ত্ৰী সৰ্বানন্দ সোণোৱাল আৰু অসম বিজেপিৰ সভাপতি ৰঞ্জিৎ দাসৰ প্ৰতিমূৰ্তি দাহ কৰে। আছুৱে দুয়োৰে সাম্প্ৰদায়িক বিষবাষ্প বিয়পোৱা আৰু বিভেদৰ ৰাজনীতি কৰা ৰাজনৈতিক নেতা বুলি অভিহিত কৰে। এটা সংবাদ বিজ্ঞপ্তিযোগে নলবাৰীত বিজেপি কৰ্মীয়ে সংঘটিত কৰা আক্ৰমণৰ ঘটনাৰ আছুৰ উত্তৰ লখিমপুৰ গোটৰ সভাপতি প্ৰাণজিৎ গগৈ আৰু সম্পাদক পুনমজ্যোতি বুঢ়াগোহায়ে গৰিহণা দিয়ে।

তেওঁলোকে কয় যে, ভাতৃঘাতী সংঘৰ্ষৰ দ্বাৰা অসমৰ সাংস্কৃতিক আৰু ভাষিক চিনাকিক মষিমুৰ কৰিবলৈ বিজেপিয়ে চলাই অহা কুচক্ৰান্তক সফল কৰিবলৈ আছুৱে এৰি নিদিয়ে। তেওঁলোকে মুখ্য মন্ত্ৰী সোণোৱালক অসমৰ স্বাৰ্থৰ হকে মাত মাতি অহা তেওঁৰ গৌৰৱময় অতীত সম্পৰ্কে মনত পেলাই দিয়ে।

গগৈ আৰু বুঢ়াগোহায়ে লগতে মুখ্য মন্ত্ৰী সোণোৱালক ৰাইজৰ পক্ষত থাকি নাগৰিকত্ব (সংশোধনী) বিধেয়ক-২০১৬ৰ বিৰোদিতা কৰাৰ বাবে আহ্বান জনায়, অন্যথা অসমৰ জনগণে তেওঁক এজন সৰ্বকালৰ ক্ষমতালোভী আৰু স্বাৰ্থপৰ মুখ্য মন্ত্ৰী হিচাপে মনত ৰাখিব বুলি সকীয়াই দিয়ে।

শুৱালকুছিৰ প্ৰতিৱেদন মুখ্যমন্ত্ৰী সৰ্বানন্দ সোনোৱাল আৰু ৰাজ্যিক বিজেপি সভাপতি ৰঞ্জিত দাসৰ পুত্তলিকা দাহ কৰিলে আছুয়ে। কালি নলবাৰীত আছু কৰ্মীৰ ওপৰত চলা বিজেপিৰ কৰ্মীৰ আক্ৰমণ বিৰুদ্ধে এই প্ৰতিবাদ। অসম আৰক্ষী চৰকাৰৰ বিৰুদ্ধে প্ৰতিবাদ সাব্যস্ত কৰে আছুয়ে।

গণতান্ত্ৰিক প্ৰতিবাদকাৰীৰ ওপৰত বিজেপি কৰ্মী আৰক্ষীৰ নিৰ্বিচাৰ আক্ৰমণক ধিক্কাৰ জনালে আছুৱে। প্ৰতিবাদ দমনৰ নামত গণতান্ত্ৰিক প্ৰতিবাদকাৰীক আক্ৰমণ কোনো পধ্যেই গ্ৰহণযোগ্য নহয়।  এই ঘটনাৰ উচিত বিচাৰৰ দাবী উত্থাপন কৰিলে আছুয়ে। শুৱালকুছিৰ বস্ত্ৰ উদ্যানৰ সন্মুখত আছুয়ে প্ৰতিবাদী কাৰ্যসূচী অনুষ্ঠিত কৰে।

 তামুলপুৰৰ প্ৰতিৱেদন থানাৰ অন্তৰ্গত তামুলপুৰ মহকুমা সদৰৰ ঘগ্ৰাচকত  আছু এ আজি নলবাৰী কাণ্ডৰ প্ৰতিবাদত মুখ্যমন্ত্ৰী সৰ্বানন্দ সোণোৱাল আৰু বিজেপি সভাপতি ৰঞ্জিত দাসৰ  প্ৰতিমূৰ্তি  দাহ কাৰ্যসূচী ৰূপায়ন কৰে । আছুৰ কেন্দ্ৰীয় সমিতিৰ ক্ৰীড়া সম্পাদক পূৰ্ণ ডেকাৰ উপস্থিতিত  তামুলপুৰ মহকুমা ছাত্ৰ সন্থা আৰু তামুলপুৰ আঞ্চলিক ছাত্ৰ সন্থাই আজি দিনৰ ১২-০০বজাত তামুলপুৰ মহকুমা সদৰৰ ঘগ্ৰাচকত মুখ্যমন্ত্ৰী সৰ্বানন্দ সোণোৱাল  আৰু বিজেপিৰ সভাপতি ৰঞ্জিত দাসৰ  প্ৰতিমুৰ্তি দাহ কৰি প্ৰতিবাদ সাব্যস্ত কৰে।

প্ৰতিবাদী কাৰ্য্যসুচীত প্ৰতিবাদী ছাত্ৰ কৰ্মী সকলে অসম চৰকাৰ হায়  হায়, সৰ্বানন্দ সোণোৱাল, হিমন্ত বিশ্ব শৰ্মা মুৰ্দাবাদ,  বিজেপিৰ গুণ্ডামি নচলিব, সদৌ অসম ছাত্ৰ সন্থা জিন্দাবাদ,  আদি শ্লোগানেৰে তামুলপুৰৰ ঘগ্ৰাচক উত্তাল কৰি তোলে। ইফালে দক্ষিণ ডেফেলী আঞ্চলিক ছাত্ৰ সন্থাই ৰঞ্জিত দাস আৰু সৰ্বানন্দ সোণোৱালৰ প্ৰতিমূৰ্তি দাহ কৰি নলবাৰী কাণ্ডৰ লগত জড়িত  গুণ্ডা বাহিনীক ধিক্কাৰ দিয়াৰ  লগতে নাগৰিকত্ব সংশোধনী বিধেয়ক-২০১৬ বাতিলৰ দাবীত গান্ধীবাৰীত  প্ৰতিবাদ সাব্যস্ত কৰে। আনহাতে কুমাৰীকাটা, দ্বাৰকুছিতো আছুই মুখ্য মন্ত্ৰী সৰ্বানন্দ সোনোৱাল আৰু বিজেপিৰ সভাপতি ৰঞ্জিত দাস প্ৰতিমুৰ্তি দাহ কৰি প্ৰতিবাদ সাব্যস্ত কৰে।