বিধেয়ক বিৰোধী সংগ্ৰামে অসমৰ ৰাইজক অধিক ঐক্যবদ্ধ কৰি তুলিছে : পৰমানন্দ ৰাজবংশী

“নাগৰিকত্ব সংশোধনী বিধেয়ক ২০১৬ বাতিলৰ দাবীত চলা সংগ্ৰামে অসমৰ ৰাইজক অধিক ঐক্যবদ্ধ কৰি তুলিছে। এই ঐক্যবদ্ধ শক্তিৰে আগবাঢ়ি গ’লে আমি এটা সমাধানৰ পথ বিচাৰি পাম।” এই মন্তব্য অসম সাহিত্য সভাৰ সভাপতি ড০ পৰমানন্দ ৰাজবংশীৰ।

ঐতিহ্যমণ্ডিত বিশ্বনাথ মহাবিদ্যালয়ৰ ৫৫ সংখ্যক মহাবিদ্যালয় সপ্তাহৰ মুকলি সভাত মুখ্য অতিথি হিচাপে অংশগ্ৰহণ কৰি অসম সাহিত্য সভাৰ সভাপতি গৰাকীয়ে নাগৰিকত্ব সংশোধনী বিধেয়কখনৰ বিষয়ে কয় যে ভাৰতীয় সংবিধানৰ সাৰ্বভৌমত্ব আৰু ধৰ্ম নিৰপেক্ষ দৃষ্টিভংগীত হাত দিব নাপায়। এই দৃষ্টি ভংগীত হাত দিয়াৰ চেষ্টা কৰিলে দেশৰ সাৰ্বভৌমত্বৰ অস্তিত্ব নোহোৱা হৈ যাব। সভাৰ মঞ্চৰ পৰাই ৰাজবংশীয়ে মাতৃভাষাৰ জ্ঞান নথকা লোকক চাকৰি  নিদিয়াৰ সিদ্ধান্ত গ্ৰহণ কৰাৰ বাবে অসম মন্ত্ৰী সভালৈ আহ্বান জনায়।

সদ্যঘোষিত ৰাজ্যৰ বাজেট সন্দৰ্ভত মত প্ৰকাশ কৰি ৰাজবংশীয়ে বাজেটখনক প্ৰসংশা কৰিলেও ইয়াক নিৰ্বাচনমুখী আখ্যা দি বহু প্ৰয়োজনীয় দিশ বাজেটৰ পৰা বাদ পৰা বুলি উল্লেখ কৰে। নাগৰিকত্ব সংশোধনী বিধেয়কে বৰ্তমান ৰজাঘৰ আৰু প্ৰজাঘৰৰ মাজত সংঘাত বৃদ্ধি কৰিছে বুলিও সাহিত্য সভাৰ সভাপতি গৰাকীয়ে তাৎপৰ্য্যপূৰ্ণ মন্তব্য কৰে। মুকলি সভাখনত আদৰণি ভাষণ প্ৰদান কৰে মহাবিদ্যালয়খনৰ অধ্যক্ষ মৃনাল কুমাৰ বৰাই।