পাকিস্তান মুৰ্দাবাদ ধ্বনিৰে হোজাইত ৰাজপথলৈ ওলাই আহিল সহস্ৰজন

যোৱা ১৪ ফেব্ৰুৱাৰিত জম্মু-কাশ্মীৰৰ পুলৱামাত সন্ত্ৰাসবাদীয়ে আক্ৰমণ চলাই ৪৪ জনকৈ ভাৰতীয় জোৱানক হত্যা কৰাৰ ঘটনাৰ প্ৰতিবাদত আজি জামিয়া ইছলামিয়া জালালিয়া মাদ্ৰাছাৰ ছাত্ৰ-ছাত্ৰী আৰু শিক্ষক-শিক্ষয়ত্ৰীসকলে হোজাই নগৰত বৃহৎ প্ৰতিবাদী সমদল বাহিৰ কৰে।

মাদ্ৰাছাখনৰ চৌহদৰ পৰা উলিওৱা উক্ত প্ৰতিবাদী সমদলত শতাধিক ছাত্ৰ-ছাত্ৰী আৰু শিক্ষক-শিক্ষয়ত্ৰীয়ে হাতে-হাতে প্লে’কাৰ্ড বেনাৰ লৈ ‘ভাৰতীয় সেনা জিন্দাবাদ’, ‘পাকিস্তান মুৰ্দাবাদ’, ‘সন্ত্ৰাসবাদ বন্ধ কৰক’, ‘ইছলামে সন্ত্ৰাসবাদ সমৰ্থন নকৰে’ আদি শ্ল’গানেৰে ৰাজপথ উত্তাল কৰি তোলে।

ইয়াৰ উপৰি আজমল ফাউণ্ডেশ্যনেও আজি হোজাই নগৰত উক্ত নাৰকীয় ঘটনাৰ বিৰুদ্ধে এক মৌন প্ৰতিবাদী সমদল বাহিৰ কৰে। দিনৰ ১২ বজাত আজমল আইন মহাবিদ্যালয় চৌহদৰ পৰা উলিওৱা সমদলত আজমল ফাউণ্ডেশ্যনৰ অন্তৰ্গত বিভিন্ন শিক্ষা প্ৰতিষ্ঠানৰ শতাধিক ছাত্ৰ-ছাত্ৰী আৰু শিক্ষক-শিক্ষয়ত্ৰীয়ে অংশগ্ৰহণ কৰে।

পিছত আজমল ফাউণ্ডেশ্যনৰ সাধাৰণ সম্পাদক খছৰুল ইছলামে সমদলকাৰী সকলৰ উপস্থিতিত হোজাই জিলাৰ চক্ৰ বিষয়াৰ জৰিয়তে ভাৰতৰ ৰাষ্ট্ৰপতিলৈ এক স্মাৰকপত্ৰ প্ৰেৰণ কৰে।

আনহাতে উক্ত সমদল দুটাৰ উপৰি সন্ত্ৰাসবাদীৰ এই বৰ্বৰ আক্ৰমণৰ প্ৰতিবাদত আজি অসম ৰাজ্যিক জমিয়ত উলেমাই জিলাখনৰ নিলবাগানত এক প্ৰতিবাদী সমদল উলিয়ায়।