মোদীয়ে পাহৰিলেও নিজে আধাৰশিলা পতা বগীবিল দলং চুই চালেহি অশীতিপৰ দেৱেগৌড়াই

বগীবিল দলঙৰ কৃতিত্ব লোৱাৰ দৌৰত প্ৰধান মন্ত্ৰী নৰেন্দ্ৰ মোদী তথা শাসকীয় বিজেপি দলে নাম ল’বলৈ পাহৰি গ’লেও মঙলবাৰে নিজে আহি চালেহি সেতুখন অনুমোদন কৰা প্ৰাক্তন প্ৰধান মন্ত্ৰী এইচ্চ দি দেৱেগৌড়াই।

নিজে আধাৰশিলা পতা দেশৰ দীৰ্ঘতম ৰে’ল আৰু পথ দলংখন পৰিদৰ্শন কৰি স্মৃতিকাতৰ হৈ পৰে দেশৰ একালৰ প্ৰধান মন্ত্ৰী তথা কৰ্নাটকৰ শাসনাধীন জনতা দল (চেকুলাৰ)ৰ মুৰব্বীজন।

“বগীবিল দলং দেখি মই বৰ নষ্টালজিক হৈ পৰিছো। কাৰণ ২২ বছৰ আগতে ময়ে দলংখনৰ আধাৰশিলা স্থাপন কৰিছিলো, কিন্তু উদ্বোধনী অনুষ্ঠানলৈ মোক নিমন্ত্ৰণ কৰা নহ’ল। মই আজি সুখী কাৰণ মোৰ সপোন পূৰা হোৱা মই দেখা পালো,” নৰ্থ ইষ্ট নাও-ক জনায় দেৱেগৌড়াই।

মোদীৰ দলং-উদ্বোধনী অনুষ্ঠানলৈ নিমন্ত্ৰণ নজনোৱাৰ বাবে পূৰ্বেও প্ৰকাৰান্তৰে আক্ষেপ প্ৰকাশ কৰা প্ৰাক্তন প্ৰধান মন্ত্ৰীজনে টুইটাৰযোগে বগীবিলৰ ছবি ৰাজহুৱা কৰিছে।

“প্রধান মন্ত্রীৰ কাৰ্য্যকালৰ সময়ত অনুমোদিত দেশৰ দীর্ঘতম পথ-ৰে’ল সেতু অসমৰ বগীবিল সেতু, ডিব্ৰুগড়, অসমলৈ গৈছিলো,” মঙলবাৰে আবেলি দেৱেগৌড়াৰ টুইট।

ನಾನು ಪ್ರಧಾನಿಯಾಗಿದ್ದ ಅವಧಿಯಲ್ಲಿ ಅನುಮೋದನೆ ನೀಡಿದ್ದ ದೇಶದ ಅತ್ಯಂತ ಉದ್ದದ ರಸ್ತೆ-ರೈಲು ಸೇತುವೆಯಾದ ಅಸ್ಸಾಂನ ದಿಬ್ರೂಗಢದ ಬೋಗಿಬಿಲ್ ಬ್ರಿಡ್ಜ್ ಗೆ ಭೇಟಿ‌ ನೀಡಿದೆ. pic.twitter.com/8FyFbzhxA7

— H D Devegowda (@H_D_Devegowda) February 19, 2019

দেশৰ ১১সংখ্যক প্ৰধান মন্ত্ৰীৰূপে (১ জুন, ১৯৯৬—২১ এ’প্ৰিল, ১৯৯৭ চন) ’৯৭ৰ ২২ জানুৱাৰিত ধেমাজিৰ কলাজলত দলংখনৰ আধাৰশিলা স্থাপন কৰিছিল দেৱেগৌড়াই। ২০০২ চনত তদানীন্তন এন ডি এ’ চৰকাৰৰ প্ৰধান মন্ত্ৰী অটল বিহাৰী বাজপেয়ীয়ে ডিব্ৰুগড়ত একেখন দলঙৰে পুনৰ আধাৰশিলা স্থাপন কৰিছিল।

প্ৰধান মন্ত্ৰী দেৱেগৌড়াৰ হস্তক্ষেপতে ১৯৯৬ চনত তেতিয়াৰ ৰে’ল মন্ত্ৰী ৰামবিলাস পাচোৱানে বাজেটত লৈছিল বগীবিল দলঙৰ প্ৰস্তাৱ।

লগতে পঢ়ক– বগীবিল দলং: বীৰেন বৈশ্যলৈ মনত নপৰিল মোদীৰ

লোকসভাত বীৰেন্দ্ৰ প্ৰসাদ বৈশ্য, ডাঃ অৰুণ শৰ্মা, কেশৱ মহন্ত, মুহিৰাম শইকীয়া আৰু প্ৰবীন শৰ্মা, ৰাজ্যসভাত পৰাগধৰ চলিহা— এই কেউগৰাকী অগপ সাংসদে দলংখনৰ বাবে দাবী উত্থাপন কৰিছিল।

বীৰেন বৈশ্য দেৱেগৌড়া চৰকাৰৰ তীখা মন্ত্ৰী আছিল।