ফাকুৱাৰ ছুটি বাতিল : ২২ আৰু ২৩ মাৰ্চত ৰাজ্যৰ কোষাগাৰ খোলা ৰখাৰ নিৰ্দেশ বিত্ত বিভাগৰ

কামৰূপ মহানগৰ জিলা প্ৰশাসনে ফাকুৱা উৎসৱ উপলক্ষে জিলাখনত ২২ মাৰ্চত স্থানীয় বন্ধ ঘোষণা কৰিছিল যদিও ৰাজ্যৰ বিত্ত বিভাগে ৰাজ্যৰ কোষাগাৰ সমূহ ২২ আৰু ২৩ মাৰ্চত খোলা ৰখাৰ নিৰ্দেশ দিছে।

উল্লেখযোগ্য যে, ফাকুৱা উপলক্ষে ২১ মাৰ্চত চৰকাৰী বন্ধত সকলো চৰকাৰী কাৰ্য্যালয় বন্ধ থাকিব। আনহাতে, ২২ মাৰ্চত কামৰূপ মহানগৰত স্থানীয় বন্ধ আৰু ২৩ মাৰ্চত চতুৰ্থ শনিবাৰৰ বাবে নিয়ম মতে চৰকাৰী কাৰ্য্যালয় বন্ধ থাকিব লাগে।

চৰকাৰৰ নিৰ্দেশৰ পাছত এতিয়া স্থানীয় বন্ধ আৰু চতুৰ্থ শনিবাৰৰ দিনটোত খোলা ৰাখিব লাগিব কোষাগাৰ।

অসম চৰকাৰৰ বিত্ত বিভাগৰ এজন বিষয়াই জনোৱা অনুসৰি মাৰ্চ মাহ সমাপ্ত হোৱাৰ লগে লগে নতুন বিত্তীয় বৰ্ষ আৰম্ভ হ’ব সেয়েহে মাৰ্চ এণ্ডিঙৰ কাৰণেই ২২ আৰু ২৩ মাৰ্চত ৰাজ্যৰ কোষাগাৰ খোলা ৰখাৰ নিৰ্দেশ দিয়া হৈছে। উৎসৱৰ মাজতো যাতে ৰাজ্যৰ উন্নয়ণ পাছপৰি নৰয় তাৰবাবে চৰকাৰ সদায় বদ্ধপৰিকৰ বুলিও বিষয়াজনে মন্তব্য কৰে।