লোকসভা নিৰ্বাচন : মাজুলীত নিৰ্বাচনী ব্যয়ৰ ওপৰত চোকা নজৰ ৰখাৰ নিৰ্দেশ উপায়ুক্তৰ

মাজুলীৰ উপায়ুক্ত তথা জিলা নিৰ্বাচন বিষয়া দেৱপ্ৰসাদ মিশ্ৰই আজি বিয়লি উপায়ুক্তৰ সভাক্ষত ‘নিৰ্বাচনী ব্যয় নিৰীক্ষণ সমিতি’ (ই ই এম চি)ৰ লগতে আদৰ্শ আচৰণ বিধি কোষ (এম চি এম চি)ৰ দায়িত্বত নিয়োজিত কাৰ্যবাহী দণ্ডাধীশ, বিভাগীয় বিষয়া আৰু আৰক্ষী বিষয়াসকলৰ সৈতে এখন গুৰুত্বপূৰ্ণ বৈঠকত মিলিত হয়।

বৈঠকত লখিমপুৰ লোকসভা সমষ্টিৰ অন্তৰ্গত মাজুলীত নিৰ্বাচনী ব্যয়ৰ ওপৰত নিৰন্তৰ চোকা নজৰ ৰখাৰ লগতে আদৰ্শ আচৰণ বিধি কঠোৰভাৱে বলৱৎ কৰিবলৈ সংশ্লিষ্ট নিৰ্বাচনী কোষে লোৱা কাৰ্যব্যৱস্থাৰ পৰ্যালোচনা কৰা হয়।

আজিৰ এই বৈঠকত মাজুলীৰ আৰক্ষী অধীক্ষক হীতেশ চন্দ্ৰ ৰায়, অতিৰিক্ত উপায়ুক্ত, অতিৰিক্ত আৰক্ষী অধীক্ষক তথা কেইবাগৰাকী আমোলা বিষয়াকে ধৰি নিৰ্বাচনী ব্যয় নিৰীক্ষণ কোষৰ অন্তৰ্গত চাৰিটাকৈ ফ্লায়িং স্কোৱাদ, ষ্টেটিক ছাৰ্ভিলেন্স টীম আৰু ভিডিঅ’ ছাৰ্ভিলেন্স টীমৰ দায়িত্বত থকা তত্বাৱধায়ক বিষয়া-কৰ্মচাৰীসকলে অংশগ্ৰহণ কৰে।

বৈঠকত অতিৰিক্ত উপায়ুক্ত চিন্ময় নাথ আৰু চক্ৰ বিষয়া অজিত কুমাৰ শৰ্মাই ফ্লায়িং স্কোৱাদ, ষ্টেটিক ছাৰ্ভিলেন্স টীম আৰু ভিডিঅ’ ছাৰ্ভিলেন্স টীমৰ তত্বাৱধায়ক আৰু সদস্যসকলক তেওঁলোকৰ দায়িত্ব আৰু নীতি-নিয়মসমূহ অৱগত কৰাই দিয়ে।

তদুপৰি মাজুলীৰ উপায়ুক্ত দেৱপ্ৰসাদ মিশ্ৰই নিৰ্বাচনী ব্যয় নিৰীক্ষণ সমিতিৰ দায়িত্বত থকা প্ৰতিগৰাকী বিষয়া-আৰক্ষীক মাজুলী জিলাত নিৰ্বাচনী ব্যয় সন্দৰ্ভত নিৰ্বাচন আয়োগৰ দ্বাৰা নিৰ্দিষ্ট কৰি দিয়া নীতি-নিয়ম কঠোৰভাৱে কাৰ্যকৰী কৰি প্ৰত্যেক দল আৰু প্ৰাৰ্থীৰ নিৰ্বাচনী খা-খৰছৰ ওপৰত চোকা নজৰ ৰাখিবলৈ নিৰ্দেশ দিয়ে।