মৰাণৰ বিশাল নিৰ্বাচনী জনসভাক সম্বোধন প্ৰধানমন্ত্ৰী নৰেন্দ্ৰ মোদীৰ

মৰাণৰ প’ল’ ক্লাৱৰ খেলপথাৰত অনুষ্ঠিত বিশাল জনসভাক সম্বোধন কৰে প্ৰধান মন্ত্ৰী নৰেন্দ্ৰ মোদীয়ে। অসমীয়া ভাষাতে অসমৰ জনতাক সম্বোধন কৰিলে মোদীয়ে। অৰুণাচল প্ৰদেশৰ আলোত নিৰ্বাচনী সভাত অংশগ্ৰহণ কৰি দ্বিতীয়খন জনসভাত অংশগ্ৰহণৰ বাবে মৰাণত উপস্থিত হৈছে প্ৰধান মন্ত্ৰীগৰাকী।

নিৰ্বাচনী অধিসূচনা জাৰিৰ পাছত প্ৰথমবাৰৰ বাবে উত্তৰ-পূৰ্বাঞ্চলত নিৰ্বাচনী প্ৰচাৰৰ বাবে অহা নৰেন্দ্ৰ মোদী ১২.৫০ বজাত হেলিকপ্তাৰেৰে আহি চেপনৰ অস্থায়ী হেলিপেডত পদাৰ্পন কৰে তাৰপৰা গাড়ীৰে আহি মৰাণত উপস্থিত হয়। মোদীক আদৰণি জনাই মুখ্য মন্ত্ৰী সৰ্বনন্দ সোণোৱাল, অসম বিজেপিৰ প্ৰভাৰী মহেন্দ্ৰ সিঙ, সাংসদ কামাখ্যা প্ৰসাদ তাছা আৰু অন্যান্য বিজেপি আৰু মিত্ৰজোঁটৰ নেতৃত্বই।

উল্লেখযোগ্য যে, ৰাজ্যিক বিজেপিৰ সভাপতি ৰঞ্জিত দাস আৰু অগপৰ সভাপতি অতুল বৰাই প্ৰতিকূল বতৰৰ কাৰণে হেলিকপ্তাৰ চলাচলৰ অনুমতি নিদিয়াৰ বাবে মোদীৰ সভাত অংশগ্ৰহণ কৰিব নোৱাৰিলে।

মৰাণত মোদীয়ে ডিব্ৰুগড়ৰ প্ৰাৰ্থী ৰামেশ্বৰ তেলী আৰু যোৰহাটৰ তপন গগৈৰ হৈ প্ৰচাৰ চলাই। হাজাৰ হাজাৰ বিজেপি সমৰ্থকে প্ৰিয় নেতাগৰাকীক দলীয় শ্লোগানেৰে অভিবাদন জনাই।

আনহাতে, মৰাণৰ পাছতে মোদী আন এখন নিৰ্বাচনী জনসভাত অংশ লোৱাৰ বাবে উৰা মাৰিব তেজপুৰ সমষ্টিৰ গহপুৰলৈ। গহপুৰত মোদীয়ে তেজপুৰৰ প্ৰাৰ্থী পল্লৱ লোচন দাস আৰু লখিমপুৰৰ প্ৰদান বৰুৱাৰ হৈ প্ৰচাৰ চলাব। গহপুৰৰ সভাৰ পাছতে দিল্লীলৈ উৰা মাৰিব মোদী।