আমগুৰিৰ ৰামুঙীয়াত যুৱকৰ মৃতদেহ উদ্ধাৰ

শনিবাৰে পুৱা ১০ মান বজাত শিৱসাগৰ জিলাৰ আমগুৰিৰ ৰামুঙীয়াৰ বেলিমুখীয়া পথাৰত এজন ৩০/৩৫ বছৰীয়া যুৱকৰ মৃতদেহ উদ্ধাৰ হোৱা ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে।

আমগুৰি আৰক্ষী থানাৰ অন্তৰ্গত বেলিমুখীয়া পথাৰত গৰু চাবলৈ যোৱা লোকে পথাৰৰ আলিত পৰি থকা মৃতদেহটো দেখা পাই আৰক্ষীক খবৰ দিয়ে।

যুৱকজনৰ পৰিচয় বৰ্তমানলৈকে জানিব পৰা নাই। আমগুৰি আৰক্ষী উপস্থিত হৈ ইতিমধ্যে ঘটনাৰ তদন্ত আৰম্ভ কৰাৰ লগতে মৃতদেহটো মৰণোত্তৰ পৰীক্ষাৰ বাবে প্ৰেৰণ কৰিছে।

চাৰ্ট আৰু জীনচ পেন্ট পৰিহিত যুৱকজনৰ কি পৰিস্থিতিত মৃত্যু হ’ল সেই বিষয়ে আৰক্ষীয়ে মৰণোত্তৰ পৰীক্ষাৰ পিছতহে নিশ্চিত হ’ব পৰা যাব বুলি মন্তব্য কৰিছে।

আৰক্ষীৰ তদন্ততহে আৰু অধিক তথ্য পোহৰলৈ আহিব বুলি আশা কৰিব পাৰি।