পুৱাৰ এজাক বৰষুণৰ ফলতেই কৃত্ৰিম বানপানীত বুৰ গ’ল মহানগৰীৰ খানাপাৰা-ন মাইল

দেওবাৰে পুৱাই অহা এজাক বৰষুণত বুৰ গ’ল মহানগৰীৰ খানাপাৰা আৰু ন মাইল অঞ্চল। আজিৰ এই কৃত্ৰিম বানপানীৰ ফলত ৩৭ নং ৰাষ্ট্ৰীয় ঘাইপথটো সম্পূৰ্ণৰূপে বুৰ যায়।

বৰষুণজাকৰ ফলত পুৱাৰ ভাগতে খানাপাৰাৰ পৰা দূৰণিবটীয়া ঠাইলৈ যোৱা বাহন সমূহ ৰখোৱা স্থানৰ পৰা ৯ মাইললৈকে কৃত্ৰিম বানপানীৰ সৃষ্টি হয়।

আনহাতে,ৰাষ্ট্ৰীয় ঘাইপথৰ কাষত থকা নলা-নৰ্দামা সমুহ চাফা নকৰা বুলি  গুৱাহাটী পৌৰ নিগমৰ ওপৰত অভিযোগ আনি স্থানীয় ৰাইজে ইয়াৰ বাবেই কৃত্ৰিম বানপানীৰ সমস্যা দেখা গ’ল বুলি মন্তব্য কৰে।

ইপিনে, খানাপাৰাৰ পৰা নমাইললৈকে ভিন্ন ঠাইত ৰাষ্ট্ৰীয় ঘাইপথৰ ওপৰত কৃত্ৰিম বানপানী হোৱাৰ ফলত এই পথেদি চলাচল কৰা যান বাহন সমুহৰ চালকৰ লগতে যাত্ৰী সকলো বিভিন্ন ধৰণৰ সমস্যাৰ সন্মুখীন হ’বলগীয়া হয়।

বৰষুণ দিয়াৰ ফলত জাৱৰ ভৰ্তি নলা সমূহেৰে পানী সৰকি যাব নোৱাৰাৰ বাবে ঘাই পথৰ ওপৰতে এনেদৰে কৃত্ৰিম বানপানীৰ সৃষ্টি হয়।

অৱশ্যে, মহানগৰীত বাৰিষাৰ দিনকেইটাত কৃত্ৰিম বানপানী কোনো নতুন সমস্যা নহয়। বছৰ বছৰ ধৰি মহানগৰবাসীয়ে কৃত্ৰিম বানপানীত জীয়াতু ভুগিবলগীয়া হৈ আহিছে যদিও ইয়াৰ কোনো স্থায়ী সমাধান সম্ভৱ হোৱা নাই।