চাৰিজন বিশিষ্ট ব্যক্তিক সম্বৰ্ধনা জনাব অসম সাহিত্য সভাই

অসম সাহিত্য সভাৰ প্ৰাক্তন সভাপতি তথা সাহিত্যাচাৰ্য চৈয়দ আব্দুল মালিকৰ জন্ম শতবৰ্ষ উপলক্ষে ৰাজ্যৰ চাৰিগৰাকী আগশাৰীৰ সাহিত্যিক আৰু শিল্পীক বিশেষ সম্বৰ্ধনা জনাব অসম সাহিত্য সভাই। বিশিষ্ট সাহিত্যিক আবু নছেৰ চাইদ আহমদ, অতুল চন্দ্ৰ মহন্ত, ড০ গিৰীশ শৰ্মা আৰু ৰাজ্যৰ বিশিষ্ট জিকিৰ আৰু জাৰী শিল্পী বদৰুদ্দিন আহমেদক সম্বৰ্ধনা জনাব ড০ ধ্ৰুবজ্যোতি বৰাই। বৃহস্পতিবাৰে অসম সাহিত্য সভাৰ প্ৰচাৰ সম্পাদক দেৱজিৎ বৰাই এক বিবৃতি যোগে সদৰী কৰে যে অসমীয়া সহিত্য আৰু শিল্প জগতলৈ আগবঢ়োৱা বিশেষ অৱদানৰ বাবে সাহিত্য সভাই এই ব্যক্তি কেইগৰাকীক সম্বৰ্ধনা জ্ঞাপন কৰাৰ সিদ্ধান্ত গ্ৰহণ কৰিছে।

সাহিত্যাচাৰ্য চৈয়দ আব্দুল মালিকৰ জন্মশতবৰ্ষৰ আৰম্ভণি অনুষ্ঠান গোলাঘাট জিলাৰ দেৰগাঁৱৰ নাহৰণিত ২০ আৰু ২১ জানুৱাৰিত দুদিনীয়া কাৰ্যসূচীৰে অনুষ্ঠিত হ’ব। আৰু প্ৰথম দিনাৰ এক বিশেষ কাৰ্যসূচীত উক্ত চাৰিগৰাকী ব্যক্তিক সম্বৰ্ধনা জনোৱা হ’ব বুলি বিবৃতিটোৰ জৰিয়তে প্ৰকাশ কৰে।

আনহাতে অসমীয়া সাহিত্যৰ অন্যতম কাণ্ডাৰী অসম সাহিত্য সভাৰ প্ৰাক্তন সভাপতি তথা সাহিত্যাচাৰ্য চৈয়দ আব্দুল মালিকৰ জন্ম শতবৰ্ষ অনুষ্ঠান অসম সাহিত্য সভাৰ কেন্দ্ৰীয় কাৰ্যসূচী হিচাপে নিজৰ জন্মস্থান গোলাগাটৰ দেৰগাঁৱৰ নাহৰণিত বিশাল আয়োজনৰ প্ৰস্তুতি প্ৰায় সম্পূৰ্ণ কৰি তুলিছে। প্ৰায় ১৫ লাখ টকা বাজেটৰ আৰম্ভণি অনুষ্ঠানত বিশাল প্ৰেক্ষাগৃহ, গ্ৰন্থমেলা আৰু গ্ৰন্থৰ বিপণী নিৰ্মানৰ কাম প্ৰায় সম্পূৰ্ণ হৈ উঠা বুলি আয়োজক সমিতিয়ে প্ৰকাশ কৰিছে। এই আৰম্ভণি অনুষ্ঠানতে পাঁচখন গ্ৰন্থ উন্মোচন কৰিব বুলিও জনায়। তদুপৰি শতবৰ্ষ অনুষ্ঠানত ৰাজ্যৰ বহু শিল্পী, সাহিত্যিক, ছাত্ৰ নেতা তথা ৰাজনীতিবিদে অংশগ্ৰহণ কৰিব।