জজ খেলপথাৰৰ মুকলি বিহুৰ বাকৰিৰ পৰাই খিলঞ্জীয়ালৈ সাহস নেহেৰুৱাৰ আহ্বান সমুজ্জ্বল ভট্টাচাৰ্য্যৰ

নাগৰিকত্ব সংশোধনী বিধেয়কৰ মাৰফতত অসমৰ জাতীয় অস্তিত্ব সংকটাপন্ন হোৱাৰ শংকাত আন্দোলন-প্ৰতিবাদেৰে উত্তপ্ত হৈ পৰা বছৰটোৰ আজি শেষৰটো দিন। এই অন্তিম দিনটোতে খিলঞ্জীয়াক সাহসেৰে আগ বাঢ়ি যোৱাৰ আহ্বান জনালে সদৌ অসম ছাত্ৰ সন্থাৰ মুখ্য উপদেষ্টা ড০ সমুজ্বল কুমাৰ ভট্টাচাৰ্য্যই।

ৰঙালী বিহুৰ আৰম্ভণিৰ দিনাই গুৱাহাটীৰ ঐতিহাসিক জজ খেলপথাৰত সদৌ অসম ছাত্ৰ সন্থাৰ উদ্যোগত অনুষ্ঠিত মুকলি বিহুৰ বাকৰিৰ পৰাই নৱবৰ্ষত এখন ‘আশাৰ অসম’ৰ কামনাৰে ৰাইজলৈ এই আহ্বান জনাইছে ভট্টাচাৰ্য্যই।

“খিলঞ্জীয়া মানুহৰ মন ভাঙি দিবলৈ এটা চক্ৰই পৰিকল্পিতভাৱে কাম কৰি আছে। কিন্তু বহাগেৰে আৰম্ভ কৰা বছৰটোত আমি আত্মবিশ্বাসেৰে আগ বাঢ়িব লাগিব, যাতে কোনো কাৰণতে আমাৰ মন ভাগি নাযায়”, আছুৰ মুখ্য উপদেষ্টাগৰাকীয়ে কয়।

চুবুৰীয়া ৰাজ্য ত্ৰিপুৰাত ৪০ লাখ মানুহৰ মাজত মাত্ৰ ১২ লাখ থলুৱা ত্ৰিপুৰীৰ মন ভাগি গৈছিল বুলি কৈ এতিয়া সেইসকল ত্ৰিপুৰীয়ে পুনৰ জাগি উঠিছে বুলি তেওঁ মন্তব্য কৰে।

বিগত বছৰবোৰৰ দৰে ছাত্ৰ সন্থাৰ উদ্যোগত অনুষ্ঠিত এই মুকলি বিহুত এক উখল-মাখল পৰিৱেশৰ সৃষ্টি হয়। বিহু নাচ আৰু বিভিন্ন লোক-কৃষ্টিয়ে উপস্থিত সকলোকে বিমুগ্ধ কৰে। বিহুগীতৰ সুৰ আৰু ঢোলৰ ছেওত ৰ’ব নোৱাৰি বিহুতলীলৈ আগুৱাই গৈ কঁকাল ঘূৰাই নাচিলে লণ্ডনৰ পৰা অহা এগৰাকী পৰ্য্যটকেও।

মুকলি বিহুৰ লগত সংগতি ৰাখি অনুষ্ঠিত কোকিলকন্ঠী গায়িকা দীপালী বৰঠাকুৰৰ শ্ৰদ্ধাঞ্জলি অনুষ্ঠানত গীত পৰিৱেশন কৰে জনপ্ৰিয় কন্ঠশিল্পী তৰালী শৰ্মা, জুবলি আৰু বৰ্ণালী কলিতাই।

জজ খেলপথাৰৰ এই অনুষ্ঠানতেই ভাৰতৰত্ন ড০ ভূপেন হাজৰিকাৰ পৰিয়াল, পদ্মশ্ৰী ইলিয়াচ আলী, উদ্ধৱ ভৰালী, চলচ্চিত্ৰ নিৰ্মাতা ৰীমা দাসকে প্ৰমুখ্য কৰি বিগত বৰ্ষত ৰাষ্ট্ৰীয় আৰু আন্তঃৰাষ্ট্ৰীয় প্ৰেক্ষাপটত সুনাম অৰ্জন কৰা অসমৰ কেইবাগৰাকীও বিশিষ্ট ব্যক্তিলৈ আছুৰ তৰফৰ পৰা সম্বৰ্ধনা জনায়।