আলফা স্বাধীনত আন এক আঘাত; অৰুণাচলৰ টিৰাপত আটক দুধৰ্ষ আলফা কেডাৰ

সংযুক্ত মুক্তি বাহিনী অসম চমুকৈ আলফা স্বাধীনৰ বাবে আন এক আঘাত হানি অসম ৰাইফলছৰ হাতত আটক হয় বিদ্ৰোহী সংগঠনটোৰ মৃদুল মহন্ত ওৰফে নিবিৰ অসম (২৫) নামৰ কেডাৰগৰাকী।

বুধবাৰে আটক হোৱা আলফা কেডাৰ মৃদুল মহন্তৰ ঘৰ তিনিচুকীয়া জিলাৰ ডুমডুমা থানাৰ অন্তৰ্গত কৰ্দৈগুৰি গাঁৱত।

প্ৰাপ্ত তথ্য অনুসৰি বুধবাৰে অসম ৰাইফলছৰ বিশেষ পহৰাদাৰী দলে এক গোপন সূত্ৰৰ পৰা লাভ কৰা খবৰৰ ভিত্তিত অভিযান চলাই অৰুণাচল প্ৰদেশৰ টিৰাপ জিলাৰ খুনছাৰ নগ্ন বস্তি অঞ্চলৰ পৰা আলফা স্বাধীনৰ দুধৰ্ষ বিদ্ৰোহী সদস্যগৰাকীক আটক কৰিবলৈ সক্ষম হয়।

উল্লেখযোগ্য যে, বিগত ওঠৰ এপ্ৰিলতো নলবাৰী জিলাৰ উদগীৰণ অসম নামৰ এজন আলফা কেডাৰে সশস্ত্ৰ বিদ্ৰোহী সংগঠনটোৰ ম্যানমাৰত থকা শিবিৰ ত্যাগ কৰি আৰক্ষীৰ ওচৰত আত্মসমৰ্পন কৰিছিল।

ম্যানমাৰৰ চাগায়িং ডিভিজনৰ টাগাত বাৰ্মিজ আৰ্মিজ অভিযানৰ পাছতে অসমৰ বিদ্ৰোহী সংগঠনটোৰ সাংগঠনিক ভেটি ক্ৰমাৎ দুৰ্বল হৈ পৰিছে। বিগত ডেৰ-দুমাহত প্ৰায় ১৫-২০ জন যুৱক-যুৱতীয়ে সংগঠনটো ত্যাগ কৰি মূল সুঁতিলৈ উভতি আহিছে।