গুৱাহাটী মণ্ডল : চি বি এছ চিৰ দশম শ্ৰেণীৰ ফলাফলত চৰকাৰী খণ্ডৰ তুলনাত ব্যক্তিগত খণ্ডৰ বিদ্যালয়ৰ আধিপত্য

আজি ঘোষিত কেন্দ্ৰীয় মাধ্যমিক শিক্ষা পৰিষদ (চি বি এছ চি) ৰ দশম শ্ৰেণীৰ ফলাফত উত্তৰ-পূবৰ গুৱাহাটী মণ্ডলত চৰকাৰী বিদ্যালয় সমূহৰ তুলনাত ব্যক্তিগত বিদ্যালয়সমূহে অধিক উন্নত ফলাফল দেখুৱাবলৈ সক্ষম হয়। ঘোষিত ফলাফল অনুসৰি চৰকাৰী বিদ্যালয়ৰ উত্তীৰ্ণৰ হাৰ ৫২.৬ শতাংশৰ বিপৰীতে ব্যক্তিগতখণ্ডৰ বিদ্যালয়ৰ উত্তীৰ্ণৰ হাৰ ৯২.৭৩ শতাংশ।

এইবাৰ গুৱহাটী মণ্ডলৰ মুঠ ৬৩,২৩৮ গৰাকী ছাত্ৰ-ছাত্ৰী দশম শ্ৰেণীৰ পৰীক্ষাত উত্তীৰ্ণ হৈছিল। ৬৩,২৩৮ গৰাকী পৰীক্ষাৰ্থীৰ ভিতৰত মুঠ ৪২,২৮৫ (নিয়মীয়া) উত্তীৰ্ণ হয়। ইয়াৰে ২২,০৭২ গৰাকী ছাত্ৰ আৰু ২০,২১৩ গৰাকী ছাত্ৰী।

আনহাতে, উত্তীৰ্ণৰ মুঠ হাৰ ৭৪.৪৯ শতাংশ। ছাত্ৰৰ উত্তীৰ্ণৰ হাৰ ৭৪.৬১ শতাংশ হোৱাৰ বিপৰীতে ছাত্ৰীৰ উত্তীৰ্ণৰ হাৰ ৭৪.৩৬ শতাংশ। বিদ্যালয় অনুপাতে কে ভি এছৰ উত্তীৰ্ণৰ হাৰ ৯৮.৪৭ শতাংশ আৰু এন ভি এছৰ উত্তীৰ্ণৰ হাৰ ৯৫.১৩ শতাংশ।

এইবাৰ চি বি এছ চিৰ গুৱাহাটী মণ্ডলত মুঠ ৯৬৬ খন বিদ্যালয়ৰ ছাত্ৰ-ছাত্ৰীয়ে ৩৩৭ টা পৰীক্ষা কেন্দ্ৰত পৰীক্ষাত অৱতীৰ্ণ হৈছিল।

উল্লেখযোগ্য যে, অৰবিন্দ কেজৰিৱাল নেতৃত্বাধীন ‘আপ’ চৰকাৰ থকা দিল্লীত উচ্চতৰ মাধ্যমিক পৰীক্ষাৰ ফলাফলত ব্যক্তিগতখণ্ডৰ শিক্ষানুষ্ঠানৰ বিপৰীতে চৰকাৰী শিক্ষানুষ্ঠানে আধিপত্য দেখুৱাৰ সময়ত গুৱাহাটী মণ্ডলত চৰকাৰী বিদ্যালয়ৰ দুৰ্বল ফলাফলে তাৎপৰ্য্য বহন কৰিছে।