এন আৰ চি এদিন দেৰি হ’লেও নহ’ব, প্ৰতীক হাজেলাক ফ্ৰী হেন্দ উচ্চতম ন্যায়ালয়ৰ

নিৰ্ধাৰিত ৩১ জুলাইতকৈ এদিনো পলম হ’ব নোৱাৰিব চূড়ান্ত এন আৰ চিৰ প্ৰকাশ।

অসমত চলিত এন আৰ চি উন্নীতকৰণত উত্থাপিত “ভুৱা আপত্তি”ৰ অভিযোগ নিষ্পত্তিৰ কৰ্তৃত্ব ৰাজ্যিক সমন্বয়ক প্ৰতীক হাজেলাক গতাই বুধবাৰৰ শুনানিত এই নিৰ্দেশ দিছে উচ্চতম ন্যায়ালয়ে।

“সাহসী হওক আৰু আইন অনুসৰি আগবাঢ়ক,” চূড়ান্ত এন আৰ চি ৩১ জুলাইতকৈ লাগিলে এদিন আগত প্ৰকাশ পাব পাৰে, কিন্তু এদিনো পলম হ’ব নোৱাৰে বুলি মন্তব্য কৰি হাজেলাক নিৰ্দেশ উচ্চতম ন্যায়ালয়ৰ।

আপত্তিৰ অভিযোগসমূহ সন্দৰ্ভত “সুবিবেচনা” (fair discretion)ৰে আইন অনুসৰি নিজাববীয়া সিদ্ধান্ত লোৱাৰ বাবে হাজেলাক ন্যায়ালয়ে কৰ্তৃত্ব প্ৰদান কৰিছে।

আপত্তি দাখিল কৰা বহু লোক শুনানিত উপস্থিত নোহোৱাৰ কথা বুধবাৰৰ শুনানিত মুখ্য ন্যায়াধীশ ৰঞ্জন গগৈ আৰু ন্যায়াধীশ ৰহিন্তম ফলি নৰিমনৰ বিচাৰপীঠক হাজেলাই অৱগত কৰিছিল।

ইতিমধ্যে বিষয়টোক লৈ আমছু, জমিয়ত উলামা ই হিন্দ আৰু সাংসদ নৱ শৰণীয়াই “ষড়যন্ত্ৰ”ৰ অভিযোগ তোলাৰ বিপৰীতে আছু আৰু এবছুৱেও প্ৰতিক্ৰিয়া প্ৰকাশ কৰিছে।

এন আৰ চি সম্পৰ্কীয় সৰ্বোচ্চ ন্যায়ালয়ৰ পৰৱৰ্তী শুনানি অহা ১০ জুলাইত অনুষ্ঠিত হ’ব।

অসমৰ এন আৰ চি বিষয়টোৰ গুৰুত্বক অগ্ৰাধিকাৰ দি গ্ৰীষ্ম বন্ধৰ মাজতো জৰুৰী প্ৰয়োজনত গোচৰটো উচ্চতম ন্যায়ালয়ৰ পঞ্জীয়কৰ ওচৰত “উল্লেখ” (mention) কৰাৰ স্বাধীনতাও বিচাৰপীঠখনে হাজেলাক প্ৰদান কৰিছে।

চূড়ান্ত এন আৰ চি নিৰ্ধাৰিত সময়তে প্ৰকাশিত হ’ব লাগিব বুলি ন্যায়াধীশদ্বয় গগৈ আৰু নৰিমনৰ বিচাৰপীঠে প্ৰথমৰে পৰা অত্যন্ত কঠোৰ স্থিতি লৈ আহিছে।

এই সম্পৰ্কীয় পূৰ্বৰ শুনানিত দেশৰ মুখ্য পঞ্জীয়ক আৰু কেন্দ্ৰীয় চৰকাৰকো বিচাৰপীঠখনে কঠোৰ সমালোচনা কৰি আহিছে।

অহা ১৫ জুনত ৰাষ্ট্ৰীয় নাগৰিকপঞ্জীৰ অতিৰিক্ত খচৰা প্ৰকাশ প্ৰকাশ পাব যদিও অহা ৩০ জুনলৈকে খচৰাত নাম নহাসকলে ভাৰতীয় বুলি প্ৰমাণ দিয়াৰ সুযোগ লাভ কৰিব।

যোৱা ৩১ ডিচেম্বৰত প্ৰকাশিত এন আৰ চিৰ চূড়ান্ত খচৰাত ২,৮৯,৮৩,৬৭৭ গৰাকী লোকৰ নাম অন্তৰ্ভুক্ত হোৱাৰ বিপৰীতে বাদ পৰিছিল ৪০,০৭,৭০৭ গৰাকী।