কালাপাহাৰ দৈগ্ৰোং হাতী দণ্ডিত চলিছে অবাধ খনন; ভয়ংকৰ হ’ব হাতী-মানুহৰ সংঘাত

কাৰ্বি আংলং জিলাৰ চিলনীজান বনাঞ্চলিক কাৰ্যালয়ৰ অধীনত থকা উওৰ-পূবৰ ভিতৰতে অতি গুৰুত্বপূৰ্ণ বুলি বিবেচিত কালাপাহাৰ দৈগ্ৰোং হাতী দণ্ডি (এনিমেল কৰিড’ৰ)ত শেহতীয়াকৈ চলা খনন কাৰ্যৰ ফলত বনৰীয়া হাতীৰ বিচৰণ চিৰদিনৰ বাবে বন্ধ হৈ পৰাৰ উপক্ৰম ঘটাইছে।

জিলাখনৰ এচাম অসাধু শিল-বালি ব্যৱসায়ীৰ দৌৰাত্ম্যত উক্ত অঞ্চলটোত অবাধে চলি আছে খনন কাৰ্য। অকল খনন কাৰ্যতেই ক্ষান্ত নাথাকি হাতী দণ্ডিত থকা বনাঞ্চলো ধ্বংস কৰি পেলাইছে। যাৰ বাবে বাধাগ্ৰস্ত হৈছে হাতীৰ বিচৰণ।

মন কৰিব লগিয়া যে গুৰুত্বপূৰ্ণ এই হাতীৰ দণ্ডিত এটা সময়ত ৰাম টেৰাং নামৰ এখন গাঁও গঢ়ি উঠিছিল। গাঁওখনৰ বাবে দণ্ডিটোত হাতীৰ চলাচলত বাধাৰ সৃষ্টি হৈছিল। অঞ্চলটোত যাৰ বাবে হাতী মানুহৰ সংঘাতো বৃদ্ধি পাইছিল ৷

কিন্তু দেশৰ আগশাৰীৰ বেচৰকাৰী প্ৰকৃতি সংগঠন ৱাইল্ড লাইফ ট্ৰাষ্ট অব ইণ্ডিয়াৰ উদ্যোগত ৰাম টেৰাং গাঁওখন হাতী দণ্ডিৰ পৰা অপসাৰিত কৰি পুনৰ সংস্থাপিত কৰাৰ পাছত পুনৰ মুকলি হৈ পৰিছিল এই হাতী দণ্ডিটো।

উল্লেখ্য যে ব্যাপক ৰূপত চলোৱা খনন কাৰ্যৰ বাবে উক্ত অঞ্চলটোত হাতীৰ সমস্যাই জটিল ৰূপ লোৱাৰ সম্ভাৱনা প্ৰকট হৈ উঠিছে। দিনৰ ভাগতে চলা এই অবৈধ খনন কাৰ্য আৰু বন ধ্বংসৰ পাছতো নীৰৱ হৈ চকু মুদা কুলিৰ ভাও ধৰিছে চিলনিজানৰ বন বিভাগে।

সময় থাকোতেই এই খনন বন্ধ নহ’লে চিৰদিনৰ বাবেই বন্ধ হৈ যাব উত্তৰ-পূবৰ এটা গুৰুত্বপূৰ্ণ হাতীৰ দণ্ডি আৰু ভয়ংকৰ হৈ উঠিব হাতী মানুহৰ সংঘাত।