গুৱাহাটীবাসীয়ে এক নতুন ৰূপত দেখিবলৈ পাব ইতিহাস সৃষ্টিকাৰী বক্সাৰ মেৰীকমক

অহা ২০ ৰ পৰা ২৪ মে’লৈ গুৱাহাটীত অনুষ্ঠিত হ’ব ইণ্ডিয়ান অ’পেন বক্সিং চেম্পিয়নশ্বিপ। ইয়াৰ মূল আকৰ্ষণ ছয়বাৰকৈ বিশ্ব চেম্পিয়নৰ খিতাপ অৰ্জনেৰে ইতিহাস সৃষ্টি কৰা তথা অলিম্পিকৰ ব্ৰঞ্জ মেডেলিষ্ট মেৰীকম।

এই প্ৰতিযোগিতাখনত মণিপুৰৰ বক্সাৰ মেৰীকমে বক্সিং কেৰিয়াৰৰ ইতিহাসত প্ৰথমবাৰৰ বাবে ৫১ কেজি শাখাত প্ৰতিদ্বন্দ্বিতা আগবঢ়াব।

’৫১ কেজি শাখাত প্ৰতিদ্বন্দ্বিতা কৰাৰ বাবে মই অনুশীলন চলাই আছো। মই প্ৰতিযোগিতাখনত সৰ্বোচ্চ দিয়াৰ আবে সাজু হৈছো। এই প্ৰতিযোগিতাখনে আগন্তুক ৱৰ্ল্ড চেম্পিয়নশ্বিপত সহায় কৰিব’। এইদৰে কয় ৩৬ বছৰীয়া মহিলা বক্সাৰ মেৰীকমে।

ইয়াৰ উপৰি তেওঁ এই প্ৰতিযোগিতাখন গুৱাহাটীত অনুষ্ঠিত হোৱাৰ বাবেও আনন্দ প্ৰকাশ কৰে। তেওঁ কয়, ‘উত্তৰ-পূবত এনেধৰণৰ এখন আগশাৰীৰ প্ৰতিযোগিতা অনুষ্ঠিত হোৱাতো যুৱ বক্সাৰসকলৰ বাবে শুভ লক্ষণ। বিশ্বৰ আগশাৰীৰ বক্সাৰসকলৰ খেল উপভোগ কৰি প্ৰতিভাধৰ যুৱ খেলুৱৈসকল যথেষ্ট পৰিমানে উপকৃত হ’ব’।

সৰুসজাইস্থিত কৰ্মবীৰ নবীন চন্দ্ৰ বৰদলৈ ইনড’ৰ ষ্টেডিয়ামত পাঁচদিনীয়াকৈ অনুষ্ঠিত হ’ব লগীয়া প্ৰতিযোগিতাখনৰ বাবে ইতিমধ্যে অসম চৰকাৰৰ সহযোগিতাত অসম বক্সিং সন্থাই প্ৰস্তুতি প্ৰায় সম্পূৰ্ণ কৰি তুলিছে।

ভাৰতৰ ৩৫ গৰাকী পুৰুষ, ৩৭ গৰাকী মহিলা বক্সাৰে প্ৰতিদ্বন্দ্বিতা আগবঢ়াব লগীয়া প্ৰতিযোগিতাখনত বহিঃৰাষ্ট্ৰৰ ১২০ গৰাকী বক্সাৰে অংশ গ্ৰহণ কৰিব বুলি অসম এমেচাৰ বক্সিং সন্থাই জনায়।

আনহাতে প্ৰতিযোগিতাখনত অসমৰ ছয়গৰাকী বক্সাৰে অংশ ল’ব। ভাৰতীয় দলক প্ৰতিনিধিত্ব কৰিব লগীয়া অসমৰ বক্সাৰ কেইগৰাকী হ’ল সদ্য সমাপ্ত এছিয়ান বক্সিং চেম্পিয়নশ্বিপত ৰূপৰ পদক বিজয়ী শিৱ থাপা, অংকুশিতা বড়ো, লাভলিনা বৰগোহাঁই, ফাইলাও বসুমতাৰী, ভাগ্যৱতী কছাৰী আৰু যমুনা বড়ো।