শিৱসাগৰৰ বৰপুখুৰী পাৰৰ বৌদ্ধ বিহাৰত বুদ্ধ জয়ন্তী উদযাপন

ঐতিহাসিক শিৱসাগৰৰ বৰপুখুৰীৰ পাৰত অৱস্থিত বৌদ্ধ বিহাৰত শনিবাৰে দিনজোৰা কাৰ্যসূচীৰে বুদ্ধ জয়ন্তী উৎসৱ উদযাপন কৰা হয়। ধৰ্মধ্বজা উত্তোলনেৰে বুদ্ধ জয়ন্তী কাৰ্যসূচীৰ শুভাৰম্ভ কৰে শিৱসাগৰ বৌদ্ধ বিহাৰৰ বিহাৰাধ্যক্ষ শ্ৰীমৎ বিক্ষোদ্ধান্দ ভিক্ষুৱে।

ইয়াৰ পাছতেই বিহাৰ চৌহদত স্বচ্চ অভিযান আৰু বৃক্ষ ৰোপণ কৰা হয়। কল্পতৰু বোধিবৃক্ষ উন্মোচন কৰে বৌদ্ধ বিহাৰৰ উপ সভাপতি ভৱেন গোঁহাই শ্যামে। ভিক্ষু বন্দনা শিল গ্ৰহণ ধৰ্মদেশনাৰ পাছত বৌদ্ধ বিহাৰৰ মহিলা সমিতিয়ে ভিক্ষু সংঘক অন্নদান কৰে।

বুদ্ধ জয়ন্তীৰ লগত সংগতি ৰাখি আয়োজন কৰা প্ৰাৰ্থনা সভা আৰু ধৰ্মসভা খন পৰিচালনা কৰে বৌদ্ধ বিহাৰৰ সম্পাদক জগত শ্যামে। সভাত সম্পাদক গৰাকীয়ে কয়, পবিত্ৰ বহাগী পূৰ্ণিমাত গৌতম সিদ্ধাৰ্থই জন্ম লাভ কৰিছিল আৰু পৰৱৰ্তী সময়ত এই পূৰ্ণিমাতেই বোধি জ্ঞান লাভ কৰি গৌতম বুদ্ধ হৈছিল।

তদুপৰি, এই পবিত্ৰ বহাগী পূৰ্ণিমাতেই তথাগত ভগৱান বুদ্ধৰ মহা পৰিনিৰ্বাণ লাভ হৈছিল। তেতিয়াৰ পৰাই বৌদ্ধ সকলে বহাগী পূৰ্ণিমাৰ এই দিনটো অতি স্মৰণীয় আৰু পবিত্ৰ দিন হিচাপে সমগ্ৰ ভাৰতবৰ্ষৰ লগতে সমগ্ৰ বিশ্বতে বুদ্ধ জয়ন্তী হিচাপে উদযাপন কৰি আহিছে বুলি শ্যামে মন্তব্য কৰে।

ধৰ্ম সভাত বিদৰ্শন ভাৱনৰ বিষয় সন্দৰ্ভত শিশুৰোগ বিশেষজ্ঞ ডাঃ মালবিকা বৰুৱা আৰু গড়গাঁও মহাবিদ্যালয়ৰ ভূতত্ব বিভাগৰ প্ৰবক্তা চন্দ্ৰাদিত্য গগৈয়ে বক্তব্য দাঙি ধৰে। ‘বৰ্তমান সমাজ ব্যৱস্থাত বৌদ্ধ ধৰ্মৰ বাণীৰে কৰণীয়’ শীৰ্ষক আলোচনা চক্ৰত সংগীত কলা কেন্দ্ৰৰ অধ্যক্ষা লক্ষীমা ফুকনে বিস্তৃত ব্যাখ্যা আগবঢ়ায়। বৌদ্ধ ধৰ্মই বিভিন্ন ধৰণে প্ৰভাম্বিত কৰা ব্যক্তি সকলৰ ব্যক্তিগত মতামত আগবঢ়ায় ক্ৰমে ভৱেন গোঁহাই, আইচেংফা ফুকন বৰুৱা, ড০ কল্পনা শ্যাম, জয়ৰাপাৰ শংকৰদেৱ শিশু নিকেতনৰ প্ৰধান আচাৰ্য অলকা বুঢ়াগোহাঁই আৰু ডাঃ সুগত শ্যামে।

অনুষ্ঠানত নাং খামথুন শ্যামে বৌদ্ধ ধৰ্মৰ কবিতা আবৃত্তি কৰাৰ লগতে লোহিত মহনে তাই গীত পৰিবেশন কৰে। সকলো শ্ৰেণীৰ ৰাইজৰ মাজত এনাজৰী শক্তিশালী কৰি বিশ্ব শান্তিৰ বাবে এই পূৰ্ণিমা তিথিত বৌদ্ধৰ চৰণত বৌদ্ধ বিহাৰৰ ভক্ত সকলে প্ৰাৰ্থণা জনায় আৰু সন্ধিয়া বন্তি প্ৰজ্বলনৰ পাছতে বৌদ্ধ গীত, বৌদ্ধ বাণী আৰু বৌদ্ধ কীৰ্ত্তন পৰিবেশনেৰে অনুষ্ঠানৰ সামৰণি মৰা হয়।