সাৱধান! কাৰ্বাইডযুক্ত আমেৰে ভৰিছে গুৱাহাটীৰ বজাৰ

এতিয়া আমৰ বতৰ। বজাৰ-সমাৰ বা ৰাস্তাৰ দাঁতিত বহা ফলৰ বেপাৰীকেইজনে কাষত সজাই ঠোৱা পূৰঠ আমকেইটা দেখি আপোনাৰো নিশ্চয় মন যায় তাৰে কেইটামান কিনি আনিবলৈ।

কিন্ত সাৱধান! বজাৰৰ পৰা লৈ অনা আমকেইটাই আপোনাৰ স্বাস্থ্যলৈ বিপদ আনিব পাৰে। কিয়নো গুৱাহাটীৰ ফল-মূলৰ বজাৰসমূহ এতিয়া ভৰি পৰিছে কাৰ্বাইডযুক্ত আমেৰে।

আজি পুৱা গুৱাহাটীৰ ফাঁচি বজাৰত খাদ্য সুৰক্ষা বিভাগৰ বিষয়াই অভিযান চলাই কাৰ্বাইডযুক্ত আমৰ কেইবাটাও বৃহৎ কাৰ্টন জব্দ কৰে। কৃত্ৰিম উপায়েৰে পকোৱা এই আমসমূহত বেজিৰে কেলচিয়াম কাৰ্বাইড আৰু স্বাস্থ্যৰ বাবে ক্ষতিকৰ আন ৰাসায়ানিক দ্ৰব্য ভৰাই দিয়া হয়।

জানিব পৰা মতে আজি জব্দ কৰা আমসমূহ গুৱাহাটীৰ বৰাগাঁৱত থকা ডাম্পিং গ্ৰাউণ্ডত পেলাই দিয়া হয়। আনহাতে অভিযান কালত কাৰ্বাইডযুক্ত আম বেচা দুজন ফল বেপাৰীক আটক কৰা হয়।

উল্লেখযোগ্য যে Prevention of Food Adulteration Act 1954ৰ অধীনত ভাৰতত কৃত্ৰিম উপায়েৰে পকোৱা কাৰ্য নিষিদ্ধ যদিও কাৰ্বাইযুক্ত ফলৰ বিক্ৰিত সংশ্লিষ্ট কৰ্তৃপক্ষই নাকি লগাব পৰা নাই।