শ্ৰী শ্ৰী কৃষ্ণগুৰুৰ আবিৰ্ভাৱ তিথি উপলক্ষে কৃষ্ণগুৰু সেৱাশ্ৰমত ভাৰতীয় ষ্টেট বেংকৰ নতুন শাখা মুকলি সৰ্বানন্দ সোণোৱালৰ

আধ্যাত্মিক গুৰু শ্ৰী শ্ৰী কৃষ্ণগুৰুৰ ৮৫ তম আবিৰ্ভাৱ তিথি উপলক্ষে আজি মুখ্য মন্ত্ৰী সৰ্বানন্দ সোণোৱালে বৰপেটা জিলাৰ সৰ্থেবাৰীস্থিত কৃষ্ণগুৰু সেৱাশ্ৰম নসত্ৰত উপস্থিত হৈ গুৰুজনাৰ প্ৰতি সেৱা আগবঢ়াই।

পবিত্ৰ দিনটোৰ লগত সংগতি ৰাখি মুখ্য মন্ত্ৰী সোণোৱালে কৃষ্ণগুৰু সেৱশ্ৰম, নসত্ৰত ভাৰতীয় ষ্টেট বেংকৰ এটা শাখা আনুষ্ঠানিকভাৱে উদ্বোধন কৰে।

ভাৰতীয় ষ্টেট বেংকৰ গুৱাহাটী গ্ৰামাঞ্চলৰ ৫০ তম শাখাটো মুকলি কৰি দিয়া ভাষণত সোণোৱালে শাখাটোৰ জৰিয়তে আৰ্থিক লেন-দেনৰ ক্ষেত্ৰত গ্ৰাম্যাঞ্চলৰ ৰাইজ বিশেষভাৱে উপকৃত হ’ব বুলি আশা ব্যক্ত কৰে।

আনহাতে, মুখ্য মন্ত্ৰী সোণোৱালে প্ৰধানমন্ত্ৰী নৰেন্দ্ৰ মোদীয়ে দেশৰ গ্ৰমাঞ্চলৰ জনসাধাৰণক অৰ্থনৈতিকভাৱে লাভাম্বিত কৰিবলৈ বহু বিত্তিয় আঁচনি গ্ৰহণ কৰিছে বুলি উল্লেখ কৰি কয় যে নসত্ৰত নতুনকৈ স্থাপন কৰা বেংকৰ শাখাটোৱে প্ৰধানমন্ত্ৰীৰ আঁচনি সমূহৰ সফল ৰূপায়ণত স্থানীয় ৰাইজক সহায় কৰিব।

তদুপৰি, অনুষ্ঠানত মুখ্য মন্ত্ৰী সোণোৱলে কৃষ্ণগুৰু মহাবিদ্যালয়ত অধ্যয়ণ কৰি সদ্যঘোষিত উচ্চতৰ মাধ্যমিক কলা শাখাৰ চূড়ান্ত পৰীক্ষাত স্থান লাভ কৰিবলৈ সক্ষম হোৱা ছাত্ৰ ক্ৰমে-জগমোহন কলিতা আৰু কৃপাময় দাসক সম্বৰ্দ্ধনা জ্ঞাপন কৰে।

আজিৰ অনুষ্ঠানত সৰুক্ষেত্ৰী সমষ্টিৰ বিধায়ক জাকিৰ হুছেইন চিকদাৰ, মঙলদৈ সমষ্টিৰ বিধায়ক গুৰুজ্যোতি দাস, লাহোৱাল সমষ্টিৰ বিধায়ক ঋতুপৰ্ণ বৰুৱা, বৰপেটা জিলাৰ উপায়ুক্ত মুনীন্দ্ৰ শর্মা, জ্যোতি চিত্ৰবনৰ অধ্যক্ষ পবিত্ৰ মাৰ্ঘেৰিটা, জি এম ডি এৰ উপাধ্যক্ষ মুকুতা ডেকা, কৃষ্ণগুৰু আন্তঃৰাষ্ট্ৰীয় পৰিচালনা সমিতিৰ সাধাৰণ সম্পাদক ৰাম গোপাল ভাগৱতী, কৃষ্ণগুৰু আধ্যাত্মিক বিশ্ববিদ্যালয়ৰ উপাচাৰ্য্য তৰুণ চন্দ্ৰ বৰা প্ৰমুখ্যে বহু গণ্য-মান্য ব্যক্তি উপস্থিত থাকে।